მედია: უკრაინამ რუსეთის უდიდეს ნავთობგადამამუშავებელ ქარხანას დრონებით შეუტია

რუსეთის ქალაქ ომსკში, სადაც ქვეყნის უდიდესი ნავთობგადამამუშავებელი ქარხანა მდებარეობს, 11 ნოემბერს უკრაინული დრონებით ინტენსიური თავდასხმა რვა საათზე მეტხანს გაგრძელდა. ინფორმაციას უკრაინული მედია ავრცელებს.

ციმბირში მდებარე ქალაქი უკრაინის აღმოსავლეთ საზღვრიდან დაახლოებით 2 500 კილომეტრით არის დაშორებული.

ომსკის ოლქის გუბერნატორმა ვიტალი ხოცენკომ განაცხადა, რომ უკრაინული დრონები რეგიონს უტევდნენ და მოსახლეობას მოუწოდა, შენობებში დარჩენილიყვნენ. ქალაქში საჰაერო განგაშის სიგნალები რვა საათზე მეტხანს ისმოდა. ადგილობრივი Telegram-არხების ცნობით, რეგიონის საჰაერო სივრცე დაიკეტა, ასევე დაწესდა შეზღუდვები მობილურ ინტერნეტზე.

დრონებით თავდასხმის შედეგად ომსკის ნავთობგადამამუშავებელი ქარხნის მიმდებარე ტერიტორიაზე ხანძარი გაჩნდა. თუმცა ჯერჯერობით უცნობია, კონკრეტულად რა სამიზნეებს მოხვდა დრონები და რა მასშტაბის დაზიანება გამოიწვია თავდასხმამ.

ხოცენკოს განცხადებით, დრონების ჩამოვარდნილი ნამსხვრევებით დაზიანებულ ყველა ადგილზე საგანგებო სამსახურები გაიგზავნა, თუმცა გუბერნატორს არ დაუკონკრეტებია, რომელ ობიექტებზე იყო საუბარი.

თავდასხმის შემდეგ მოსახლეობა რამდენიმე რაიონში ელექტროენერგიის გათიშვის შესახებაც იუწყებოდა.

ომსკის ნავთობგადამამუშავებელი ქარხანა გადამუშავების სიმძლავრით რუსეთის უმსხვილესი საწარმოა. სახელმწიფო ენერგოკომპანია „გაზპრომის“ საკუთრებაში არსებული ობიექტი წელიწადში 21 მილიონ ტონაზე მეტ ნედლ ნავთობს ამუშავებს.

ქარხანა რუსეთში წარმოებული ბენზინისა და დიზელის საწვავის ყოველი ექვსი ლიტრიდან ერთს აწარმოებს.

უკრაინის თავდაცვის ძალებმა ომსკის ნავთობგადამამუშავებელ ქარხანას მანამდეც ორჯერ შეუტიეს - 2026 წლის ივლისსა და ოქტომბერში.