Financial Times: საფრანგეთი გერმანიისგან განმარტებას ითხოვს იმის შესახებ, თუ როგორ აპირებს ბერლინი რუსეთთან პოტენციური კონფლიქტის დროს შორი მოქმედების რაკეტების გამოყენებას - პარიზი შიშობს, რომ მოსკოვმა შესაძლოა კონვენციური დარტყმები არასწორად აღიქვას და ბირთვული იარაღით უპასუხოს

საფრანგეთი გერმანიისგან განმარტებას ითხოვს იმის შესახებ, თუ როგორ აპირებს ბერლინი რუსეთთან პოტენციური კონფლიქტის დროს შორი მოქმედების რაკეტების გამოყენებას. როგორც Financial Times-ი მოლაპარაკებების დეტალებზე ინფორმირებულ ოფიციალურ პირებზე დაყრდნობით წერს, პარიზი შიშობს, რომ მოსკოვმა შესაძლოა კონვენციური დარტყმები არასწორად აღიქვას და ბირთვული იარაღით უპასუხოს.

გამოცემის ცნობით, ფრანგი და გერმანელი მაღალჩინოსნები გამართავენ მოლაპარაკებებს, რომელთა მიზანია შორი მოქმედების კონვენციურ იარაღთან დაკავშირებით ბერლინის მიდგომის საფრანგეთის ბირთვული შეკავების სტრატეგიასთან შეჯერება. პარიზი ძირითადად იმის გამო შფოთავს, რომ რუსული სამიზნის წინააღმდეგ მიმართულმა კონვენციურმა სარაკეტო დარტყმამ შესაძლოა მოსკოვის მხრიდან არასწორი ინტერპრეტაცია და, შესაბამისად, შესაძლო ბირთვული ესკალაცია გამოიწვიოს.

ეს დისკუსიები იმ ფონზე მიმდინარეობს, როდესაც გერმანია და ევროპის სხვა ქვეყნები რუსეთიდან მომდინარე მზარდი საფრთხის საპასუხოდ შორი მოქმედების დამრტყმელ შესაძლებლობებს აფართოებენ. კერძოდ, ბერლინი ყიდულობს და ავითარებს სახმელეთო ბაზირების რაკეტებს, რომელთა მოქმედების რადიუსი 500-დან 2000 კილომეტრზე მეტს შეადგენს - ეს კი მას რუსეთის ტერიტორიის სიღრმეში მდებარე სამიზნეებზე დარტყმის საშუალებას აძლევს.

საფრანგეთში განსაკუთრებით აწუხებთ კითხვა, თუ როგორ მოთავსდება ეს შეიარაღება პრეზიდენტ ემანუელ მაკრონის კონცეფციაში, რომელიც ფრანგული ბირთვული შეკავების გავრცელებას ევროპელ პარტნიორებზე ითვალისწინებს. ფრანგი ოფიციალური პირები შიშობენ, რომ მოსკოვმა შესაძლოა პარიზს დააკისროს პასუხისმგებლობა იმ კონვენციურ დარტყმებზე, რომლებსაც სხვა ევროპული ქვეყნები უფრო ფართო შეკავების არქიტექტურის ფარგლებში განახორციელებენ.

როგორც ერთ-ერთმა ფრანგმა მაღალჩინოსანმა FT-ს განუცხადა, საფრანგეთმა შეიმუშავა საკუთარი ბირთვული „გრამატიკა და ლექსიკა“ - შეკავებისა და ესკალაციის რისკების კომუნიკაციის ჩამოყალიბებული წესი, რომელიც გერმანიასა და სხვა არაბირთვულ ევროპელ მოკავშირეებს არ გააჩნიათ. თავის მხრივ, გერმანიის მაღალჩინოსანმა აღიარა, რომ ევროპულ ქვეყნებს ესაჭიროებათ საერთო ხედვის ჩამოყალიბება იმის შესახებ, თუ როგორ უნდა იქნას გამოყენებული შორი მოქმედების იარაღი და როგორ უნდა იმართოს ბირთვული ესკალაციის რისკები.