ინგლისის პოლიციამ სატვირთო მანქანაში ნაპოვნი ცხედრების იდენტიფიკაციაში დახმარება ვიეტნამს სთხოვა

ინგლისის პოლიცია ესექსის საგრაფოში სატვირთო მანქანაში ნაპოვნი ცხედრების იდენტიფიკაციაში დახმარებას ვიეტნამელებს სთხოვს. ამის შესახებ BBC წერს.

გამოცემის ინფორმაციით, გამომძიებლები ბრიტანეთში ვიეტნამის ელჩს შეხვდნენ, რომელიც მათ დახმარებას დაპირდა. ვიეტნამში კი მომხდართან დაკავშირებით გამოძიება დაიწყო. ამასთან, ბრიტანელებმა დახმარება ვიეტნამურ დიასპორასაც სთხოვეს.

მანამდე გავრცელდა ინფორმაცია, რომ დაღუპულთა შორის ვიეტნამელები არიან. BBC-მ იპოვა ვიეტნამელი ოჯახები, რომლებიც დიდ ბრიტანეთში მყოფ საკუთარ ნათესავებს ვერ უკავშირდებიან. გამოცემამ შესაძლო მსხვერპლთა ოჯახების მიერ მოწოდებული ინფორმაცია პოლიციას გადასცა.

სამართალდამცველები ვარაუდობენ, რომ შესაძლოა დიდ ბრიტანეთში სატვირთო მანქანებით სულ 100-მდე მიგრანტი შემოვიდა. პოლიციაში მიიჩნევენ, რომ ისინი შეიძლება სხვადასხვა ქვეყნიდან იყვნენ.

ესექსის საგრაფოში სატვირთო მანქანის კონტეინერში​ 31 კაცისა და 8 ქალის ცხედარი 23 ოქტომბერს იპოვეს. მომხდართან დაკავშირებით 4 ადამიანი დააკავეს.