ლევან მაჭავარიანი: ომის დაწყებიდან დღემდე ევროკავშირმა რუსეთთან ენერგორესურსებით ვაჭრობაში თითქმის ნახევარი ტრილიონი დოლარი დახარჯა. ფაქტობრივად, ამით რუსეთის სასარგებლოდ ომს აფინანსებს

„ომის დაწყებიდან დღემდე ევროკავშირმა რუსეთთან ენერგორესურსებით ვაჭრობაში თითქმის ნახევარი ტრილიონი დოლარი დახარჯა. ფაქტობრივად, ამით რუსეთის სასარგებლოდ ომს აფინანსებენ“, - განაცხადა საპარლამენტო ფრაქცია „ქართული ოცნების“ თავმჯდომარის პირველმა მოადგილემ, ლევან მაჭავარიანმა.

მისი თქმით, ევროკავშირის მიერ რუსეთთან ვაჭრობის შედეგად გადახდილი თანხა იმაზე მეტია, ვიდრე ჯამურად უკრაინისთვის გამოყოფილი დახმარება, შესაბამისად, ამ ციფრებს ევროკავშირი ვერ გაექცევა.

„ეს ჩვენი საზოგადოებისთვის კიდევ ერთი დასტურია იმისა, თუ რამდენად უნამუსოდ იქცევა ბრიუსელი კონკრეტულად საქართველოსთან მიმართებით. ყველას კარგად გვახსოვს, რა ზეწოლა ხორციელდებოდა და ახლაც ხორციელდება, რათა რუსეთს სანქციები დავუწესოთ. ეს, რა თქმა უნდა, ერთი მხრივ, საქართველოს ეკონომიკას ჩამოანგრევს, მეორე მხრივ კი, პირდაპირი პოლიტიკური მესიჯია, რომელსაც, დიდი ალბათობით, სამხედრო ესკალაცია მოჰყვება.

ამ ყველაფრის ფონზე, ომის დაწყებიდან დღემდე ევროკავშირმა რუსეთთან ენერგორესურსებით ვაჭრობაში თითქმის ნახევარი ტრილიონი დოლარი დახარჯა. ფაქტობრივად, ამით რუსეთის სასარგებლოდ ომს აფინანსებს. ეს იმაზე დიდი თანხაა, ვიდრე ჯამურად უკრაინისთვის გამოყოფილი დახმარება. შესაბამისად, ამ ციფრებს ისინი ვერ გაექცევიან“, - აღნიშნა მაჭავარიანმა.