„უშუალოდ არჩევნების წინ ოპოზიციური პარტიის წევრის სახლის ჩხრეკა ზღვარგადასული უკანონობაა“ - „დემოკრატები“ ტრამპის ადმინისტრაციას პოლიტიკური მოწინააღმდეგეების მიმართ ძალაუფლების ინსტრუმენტად გამოყენებაში ადანაშაულებენ

„დემოკრატმა“ კანონმდებლებმა შეშფოთება გამოთქვეს მას შემდეგ, რაც ფედერალურმა აგენტებმა კონგრესმენ ილჰან ომარის სახლი გაჩხრიკეს, - წერს ამერიკული გამოცემა The Hill-ი.

„დემოკრატები“ ტრამპის ადმინისტრაციას პოლიტიკური მოწინააღმდეგეების მიმართ ძალაუფლების ინსტრუმენტად გამოყენებაში ადანაშაულებენ.

„დემოკრატები“ განსაკუთრებით გაღიზიანებულნი არიან იმით, რომ ოპერაცია, რომელიც ორშაბათს დილით აშშ-ის საიმიგრაციო და საბაჟო სამსახურის (ICE) აგენტებმა ჩაატარეს, 3 ნოემბრის შუალედურ არჩევნებამდე სულ რამდენიმე კვირით ადრე განხორციელდა.

ისინი პრეზიდენტ ტრამპს იუსტიციის დეპარტამენტის იმ ხანგრძლივი პოლიტიკის დარღვევაში ადანაშაულებენ, რომელიც არჩევნებამდე 60 დღით ადრე პოლიტიკურად მგრძნობიარე გამოძიებების გააქტიურებას ეწინააღმდეგება.

„ფასების ზრდისა და მისი უკიდურესად არაპოპულარული ომის ფონზე, როდესაც ტრამპის რეიტინგი კატასტროფულად ეცემა, ყველაფერი, რასაც ის აკეთებს, მისი დარჩენილი მხარდამჭერებისთვის თვალის ახვევის მცდელობაა. მაგრამ უშუალოდ არჩევნების წინ ოპოზიციური პარტიის წევრის სახლის ჩხრეკა - თანაც Fox News-ისთვის ამის წინასწარ შეტყობინება, რათა ადგილზევე გაეშუქებინათ - დონალდ ტრამპის სტანდარტებითაც კი ზღვარგადასული უკანონობაა“, - განაცხადა „დემოკრატმა“ კონგრესმენმა, დონ ბაიერმა.

წარმომადგენელთა პალატაში „დემოკრატთა“ სამმა ლიდერმა - ჰაკიმ ჯეფრისმა, კეტრინ კლარკმა და პიტ აგილარმა - ერთობლივ განცხადებაში ჩხრეკა შეაფასეს, როგორც „ღრმად შემაშფოთებელი“ გაგრძელება ტრამპის ხანგრძლივი დაპირისპირებისა ილჰან ომართან.