აშშ-ის ფედერალურმა აგენტებმა „დემოკრატი“ კონგრესმენის, ილჰან ომარის სახლში ჩხრეკა ჩაატარეს - კონგრესმენი აცხადებს, რომ პოლიტიკური ზეწოლის მიუხედავად, საარჩევნო ბრძოლის გაგრძელებას გეგმავს

ფედერალურმა აგენტებმა ორშაბათს აშშ-ის წარმომადგენელთა პალატის „დემოკრატი“ წევრის, ილჰან ომარის სახლში ჩხრეკა ჩაატარეს.

ჩხრეკის შემდეგ ომარმა განაცხადა, რომ მას „ვერ გააჩუმებენ“ და მისი სახლის ჩხრეკას პრეზიდენტ დონალდ ტრამპის მხრიდან წარმოებული „დაშინების კამპანიის მორიგი ესკალაცია“ უწოდა.

აშშ-ის იუსტიციის დეპარტამენტმა ოფიციალურ განცხადებაში დაადასტურა, რომ შიდა უსაფრთხოების გამოძიების აგენტებმა ვაშინგტონში სასამართლოს მიერ გაცემული ჩხრეკის ორდერი აღასრულეს, რაც მიმდინარე სისხლის სამართლის საქმეს უკავშირდება. თუმცა, უწყებას დეტალები არ დაუზუსტებია.

მინესოტას შტატის კონგრესმენის სახლში ჩხრეკა შუალედურ არჩევნებამდე ცოტა ხნით ადრე, რომელმაც წარმომადგენელთა პალატასა და სენატში ძალთა ბალანსი უნდა განსაზღვროს, კონგრესის „დემოკრატებმა“ მკვეთრად დაგმეს.

ინციდენტმა კითხვები გააჩინა იუსტიციის დეპარტამენტის ხანგრძლივ პროტოკოლთან დაკავშირებით, რომელიც კრძალავს არჩევნების უშუალო წინაპერიოდში პოლიტიკური კანდიდატების წინააღმდეგ ღია საგამოძიებო მოქმედებების ჩატარებას.

გამოძიების ზუსტი შინაარსი და მასშტაბი ჯერჯერობით უცნობია, თუმცა ტრამპის ადმინისტრაციის ოფიციალური პირები მანამდეც არაერთხელ მიანიშნებდნენ ომარის წინააღმდეგ მოკვლევის არსებობაზე.

სომალიში დაბადებული „დემოკრატი“ კონგრესმენი, რომლის მიგრანტის სტატუსი და მემარცხენე პოლიტიკური შეხედულებები ხშირად ხდებოდა „რესპუბლიკელებისა“ და ტრამპის ადმინისტრაციის კრიტიკის სამიზნე, აცხადებს, რომ პოლიტიკური ზეწოლის მიუხედავად, საარჩევნო ბრძოლის გაგრძელებას გეგმავს.