სოზარ სუბარი არასამთავრობოებზე: როცა ნახეს, რომ სასამართლომ, რომელიც გახდა დამოუკიდებელი, არ დაიწყო მათი თამაში, არ გახდა მათი ჯიბის სასამართლო, ამის შემდეგ კატეგორიულად შეიცვალა მოთხოვნა და წამოვიდა ეს ე.წ. „ვეტინგი“

პარლამენტის ვიცე-სპიკერმა, ყოფილმა სახალხო დამცველმა სოზარ სუბარმა გადაცემა „იმედის კვირასთან“ 2012 წლის სკანდალური ფაქტი გაიხსენა. კერძოდ, ხელისუფლების ცვლილებისთანავე, ეკა გიგაური და დასავლელი ელჩები კატეგორიულად ითხოვდნენ, რომ ახალ მთავრობას ხელი არ ეხლო სააკაშვილისდროინდელი მოსამართლეებისთვის და ისინი უვადოდ დაენიშნა, სანაცვლოდ კი სრულ პოლიტიკურ ინდულგენციას სთავაზობდნენ.

„ამის შემდეგ, როცა ნახეს, რომ სასამართლომ, რომელიც გახდა დამოუკიდებელი, არ დაიწყო მათი თამაში, არ გახდა მათი ჯიბის სასამართლო, ამის შემდეგ კატეგორიულად შეიცვალა მოთხოვნა და წამოვიდა ეს ე.წ. „ვეტინგი“. თვითონ სახელწოდებაც კი შეურაცხმყოფელია იმიტომ, რომ „ვეტინგი“ თავდაპირველი მნიშვნელობით ნიშნავდა ცხენების შემოწმებას დოღის წინ და რაღაც ასეთი შემოწმება უნდა ჩაუტარდეთ თურმე სასამართლოს წევრებს და მოსამართლეებს“, - აღნიშნა სოზარ სუბარმა.