ირაკლი ხელაძე „ნაცმოძრაობაზე“: ჩვენ ვართ შესული ისტორიულ სამართლებრივ პრეცედენტულ პროცესში, გვაქვს საკონსტიტუციო სარჩელი გაკეთებული, სადაც ობიექტურად მოყვანილია ის ფაქტები და დანაშაულები, რასაც წლების განმავლობაში ეს ადამიანები კოლექტიურად აკეთებდნენ ჩვენი ქვეყნის ეროვნული ინტერესების საწინააღმდეგოდ

არავის თვითმიზანი არ არის, მათ შორის, არც ერთი ჩემი თანაგუნდელის, რომ გინდა თუ არა ხელაღებით მოხდეს პარტიების აკრძალვა, - განაცხადა „დღის ქრონიკასთან“ საპარლამენტო უმრავლესობის წევრმა, საფინანსო-საბიუჯეტო კომიტეტის თავმჯდომარის პირველმა მოადგილემ, ირაკლი ხელაძემ საკონსტიტუციო სასამართლოში დღეს განვითარებულ მოვლენებზე საუბრისას.

მისივე თქმით, ისინი იმყოფებიან ისტორიულ სამართლებრივ პრეცედენტულ პროცესში, საკონსტიტუციო სარჩელია გაკეთებული, სადაც ობიექტურად მოყვანილია ის ფაქტები და დანაშაულები, რასაც წლების განმავლობაში „ნაციონალური მოძრაობა“ კოლექტიურად აკეთებდა ქვეყნის ეროვნული ინტერესების საწინააღმდეგოდ.

„დღეს პირდაპირ თავს დაესხნენ 1,120 მილიონ „ქართული ოცნების“ ამომრჩეველს და მათ პრორუსები უწოდეს. ასევე დღევანდელ სხდომაზე, სავარაუდოდ, გვარამიას პარტიის წარმომადგენელმა საერთოდ კავშირი ვერ დაადგინა ადამიანის უფლებების დარღვევასა და კონსტიტუციურ წყობილებას შორის.

ასეთი არაკომპეტენტურობა, არაპროფესიონალიზმი ასეთი უხეში და უტიფარი დამოკიდებულება გრძელდება მათი მხრიდან, თუმცა ყველამ კარგად დაიმახსოვროს, რომ ჩვენ ვართ შეუქცევად პროცესში. არავის თვითმიზანი არ არის, მათ შორის, არც ერთი ჩემი თანაგუნდელის, რომ გინდა თუ არა ხელაღებით მოხდეს პარტიების აკრძალვა. ჩვენ ვართ შესული ისტორიულ სამართლებრივ პრეცედენტულ პროცესში, გვაქვს საკონსტიტუციო სარჩელი გაკეთებული, სადაც ობიექტურად მოყვანილია ის ფაქტები და დანაშაულები, რასაც წლების განმავლობაში ეს ადამიანები კოლექტიურად აკეთებდნენ ჩვენი ქვეყნის ეროვნული ინტერესების საწინააღმდეგოდ.

შესაბამისად, ჩვენ მოლოდინი გვაქვს იმის, რომ არც სასამართლო, არც სისტემა არ მისცემს იმის შესაძლებლობას ამ ადამიანებს, რომ ეს პროცესი გადაიყვანონ პოლიტიკურ ჭრილში. ეს პროცესი გამოიყენონ იმისთვის, რომ დეზინფორმაციული და კამპანიური განცხადებები აკეთონ და საბოლოო ჯამში, ახდეს ქართველი ხალხის მიზანი, რაც იყო 2012 წლის შემდეგ, მთავარი მოთხოვნა, რომ ერთხელ და სამუდამოდ ჩვენს ქვეყანაში დამყარდეს კონსტიტუციური წესრიგი იმგვარად, რომ პოლიტიკურ პარტიებს, ვისაც გადაწყვეტილი აქვს, რომ მუდმივად აზიანონ ჩვენი სახელმწიფოს ეროვნული ინტერესები, ფიზიკურად აღარ ეძლეოდეთ იმის შესაძლებლობა, რომ მუდმივი ქაოსით, დესტაბილიზაციის მცდელობებით არიონ ჩვენი ქვეყანა“, - განაცხადა ხელაძემ.