იტალიაში საპარლამენტო არჩევნებია

დღეს იტალიაში საპარლამენტო არჩევნები ჩატარდება. საარჩევნო ყუთებთან ამომრჩეველი გადაწყვეტილებას ადგილობრივი დროით 07:00-დან 23:00-მდე დააფიქსირებს. ამის შესახებ BBC წერს.

4 მარტის საპარლამენტო არჩევნები იტალიაში წინა არჩევნებისგან იმით გამოირჩევა, რომ ის ახალი, Rosatellum-ის სახელით ცნობილი სისტემის მიხედვით გაიმართება.

მანდატების 37% ადგილობრივ ოლქებზეა დამოკიდებული და გამარჯვებული ხმების უბრალო უმრავლესობის მქონე კანდიდატი გახდება. დანარჩენი 63% კი საიდუმლო პროპორციული სიებით გადანაწილდება.

იტალიის საკანონმდებლო ორგანო ორპალატიანია (დეპუტატების პალატა და სენატი) და ის 945 დეპუტატით დაკომპლექტდება. მათგან 630 პალატაში და 315 სენატში გადანაწილდება.

იტალიის არჩევნებში რამდენიმე პარტია და 10-მდე საარჩევნო კოალიცია მიიღებს მონაწილეობას. ყველაზე მეტი მანდატის მოპოვებას კი Forza Italia-ს, ქვეყნის ოთხგზის პრემიერმინისტრის - სილვიო ბერლუსკონის პოლიტიკურ გაერთიანებას უწინასწარმეტყველებენ.

არჩევნებში მონაწილეობს მატეო რენცის დემოკრატიული პარტიაც. პოლიტიკური ბლოკის სიიდან იყრის კენჭს მოქმედი პრემიერმინისტრი პაოლო ჯენტილონიც.

The Termometro Politico poll-ის მიერ იტალიაში წინასაარჩევნო კვლევის შედეგები ასე გამოიყურება:

• ფორცა იტალია - 15.9 %;
• ჩრდილოური ლიგა და იტალიის ძმები (Lega Nord, Fratelli d'Italia) - 14.8 %;
• ჩვენ და იტალია (Noi con l'Italia) - 1.8 %;
• დემოკრატიული პარტია - 21.3 %;
• თავისუფლების და სამართლიანობის პარტია - 5.3 %;
• + ევროპა (Piu' Europa) - 2.6 %;
• სამოქალაქო საზოგადოების პარტია (Lista Insieme) - 0.6 %;
• ხუთი ვარსკვლავის მოძრაობა (Movimento 5 Stelle) - 26.3 %;
• სხვა პარტიები - 3.3 %.

იტალიამ მეორე მსოფლიო ომის დასრულებიდან დღემდე 64 მთავრობა და 28 პრემიერმინისტრი გამოიცვალა.