Die Welt am Sonntag: ევროკავშირს, სავარაუდოდ, უკრაინის გამო ახალი სესხების აღება მოუწევს

ალტერნატივების არარსებობის ფონზე, ევროკავშირის ჯამური ვალი, რომელიც უკრაინისთვის გაწეულ დახმარებას უკავშირდება, შესაძლოა მალე 200 მილიარდი ევროს ზღვარს გასცდეს. გერმანული გამოცემა Die Welt am Sonntag-ის გათვლებით, ევროკომისიის მონაცემებზე დაყრდნობით, ბრიუსელს, სავარაუდოდ, კიევისთვის კიდევ 40 მილიარდზე მეტი ევროს გამოყოფა მოუწევს (უკვე გადარიცხული 166 მილიარდის გარდა) ერთობლივი სესხების მოზიდვის ხარჯზე.

ცოტა ხნის წინ უკრაინის პრეზიდენტმა, ვოლოდიმირ ზელენსკიმ დამატებითი ფინანსური საჭიროების შესახებ განაცხადა, რომლის მოცულობაც 70 მილიარდი ევროა. მიმდინარე გეგმების თანახმად, ამ თანხიდან 46 მილიარდი ევრომ ევროკავშირმა უნდა იტვირთოს. აღნიშნული თანხის ნაწილის დაფარვა ევროპაში გაყინული რუსული აქტივებიდან მიღებული პროცენტებით იგეგმება.

თუმცა, ევროკომისიის მონაცემებით, ამ აქტივებიდან მიღებული შემოსავლები, სავარაუდოდ, წელიწადში მხოლოდ რამდენიმე მილიარდ ევროს შეადგენს. ბოლო ორ წელზე მეტი ხნის განმავლობაში დაახლოებით 8 მილიარდი ევრო დაგროვდა. ბოლო ტრანში აგვისტოში გადაირიცხა და 1.4 მილიარდი ევრო შეადგინა.

მანამდე ბრიუსელმა კიდევ ოთხი ტრანში გასცა: 1.4 მილიარდი ევრო მიმდინარე წლის აპრილში, 1.6 მილიარდი - 2025 წლის აგვისტოში, 2.1 მილიარდი - 2025 წლის აპრილში და 1.5 მილიარდი - 2024 წლის ივლისში. შესაბამისად, ამჟამადაც კი ეს სახსრები საჭირო 46 მილიარდიდან მხოლოდ მცირე ნაწილს ფარავს.

„ვინაიდან გაყინული რუსული აქტივების ძირითადი კაპიტალი იურიდიული მიზეზების გამო კვლავ ხელშეუხებელი რჩება, ახალი ერთობლივი სესხების მოზიდვა ყველაზე სავარაუდო გამოსავლად ჩანს“, - აღნიშნულია სტატიაში.

აღსანიშნავია, რომ რუსეთის მიერ სამოქალაქო ენერგეტიკულ და ლოგისტიკურ ინფრასტრუქტურაზე მიტანილი მიზანმიმართული დარტყმები უკრაინის სახელმწიფო ბიუჯეტის დეფიციტის შემდგომ ზრდას იწვევს, რომელიც უკვე დაახლოებით ნახევრად არის დამოკიდებული ევროკავშირის დახმარებაზე.

ევროკავშირის მრავალ ქვეყანაში უკრაინისთვის შემდგომი დახმარების იდეის მიუღებლობა იზრდება. მომავალი წლის მაისში საფრანგეთში საპრეზიდენტო არჩევნები გაიმართება. რბოლის ერთ-ერთი ფავორიტი, მარინ ლე პენი უკრაინისთვის დახმარების შეწყვეტისა და ფრანგული გადახდების რადიკალური შემცირების მომხრეა - დაახლოებით ამჟამინდელი დონის 20%-მდე.

გერმანული პარტია „მემარცხენეების“ წარმომადგენელმა, დიტმარ ბარჩმა უკრაინისთვის ახალი დახმარების პაკეტები გააკრიტიკა: „მოქალაქეები საკუთარი ფულით არ უნდა იხდიდნენ პუტინის ომის საფასურს. უკრაინის დახმარება მისაღებია მხოლოდ იმ შემთხვევაში, თუ ის არ გამოიწვევს ჩვენს ქვეყანაში სოციალური ხარჯების შემცირებას“.

მისი თქმით, მერცმა და ევროკავშირის ხელმძღვანელობამ საბოლოოდ უნდა მიიღონ აქტიური მონაწილეობა სამშვიდობო მოლაპარაკებებში.

გერმანიის ეკონომიკური კვლევების ინსტიტუტის ხელმძღვანელი, მარსელ ფრაცშერი ომთან დაკავშირებით „ერთობლივი ევროპული ობლიგაციების“ გამოშვებას უჭერს მხარს. მისი აზრით, გრძელვადიან პერსპექტივაში მათი დაფარვა საერთო საპროცენტო შემოსავლების ხარჯზე უნდა იყოს უზრუნველყოფილი. გადაწყვეტილების მიღებისას მთავარი ფაქტორები უნდა იყოს დაფინანსების საჭიროება, სახსრების გამოყენების ეფექტურობა, აგრეთვე ევროპის გრძელვადიანი ეკონომიკური ინტერესები და მისი უსაფრთხოების საკითხები.