Financial Times: აშშ-ის კონგრესში „დემოკრატები“, შუალედურ არჩევნებში გამარჯვების შემდეგ, უკრაინისთვის დაახლოებით 15 მილიარდი დოლარის ოდენობის სამხედრო დახმარების ახალ პაკეტს ამზადებენ

აშშ-ის კონგრესში „დემოკრატები“, შუალედურ არჩევნებში გამარჯვების შემდეგ, უკრაინისთვის დაახლოებით 15 მილიარდი დოლარის ოდენობის სამხედრო დახმარების ახალ პაკეტს ამზადებენ. ამის შესახებ ბრიტანული გამოცემა Financial Times-ი წყაროებზე დაყრდნობით იუწყება.

გამოცემის ცნობით, კანონმდებლები საბიუჯეტო ხარჯებსა და ზედამხედველობაზე თავიანთი უფლებამოსილების გამოყენებას გეგმავენ, რათა გაძლიერდეს კიევის მხარდაჭერა და დაწესდეს დამატებითი სანქციები რუსეთის ეკონომიკის წინააღმდეგ.

უკრაინის მხარდამჭერები იმედოვნებენ, რომ იანვარში კონგრესის ახალი შემადგენლობის უფლებამოსილების დაწყებამდე დარჩენილ დროს მაქსიმალურად გამოიყენებენ. „ენერგეტიკული დახმარება ამ პერიოდში ჩვენი პრიორიტეტების სიის სათავეშია“, - განუცხადა FT-ს წარმომადგენელთა პალატის კომიტეტის დემოკრატმა წევრმა.

კანონმდებლები შეეცდებიან, დახმარების პაკეტი ეროვნული თავდაცვის ავტორიზაციის ყოველწლიურ აქტში (NDAA) ასახონ, რომელიც მიმდინარე კონგრესის უფლებამოსილების ამოწურვამდე უნდა დამტკიცდეს. ორგანიზაცია Razom for Ukraine-ის უფროსი მრჩევლის, მელინდა ჰარინგის განცხადებით, მოსალოდნელია ცვლილებები სანქციების, სადაზვერვო მხარდაჭერის, საჰაერო თავდაცვის რაკეტების, ასევე Starlink-ისა და Starfield-ის მიმართულებით.

ამასთან, დემოკრატების ერთ-ერთი მთავარი პრიორიტეტი ლინდსი გრემის სახელობის სანქციების კანონში ცვლილებების შეტანა იქნება. აღნიშნული კანონი რუსეთის თავდაცვისა და ენერგეტიკის სექტორების წინააღმდეგ ფინანსურ სანქციებს ითვალისწინებს. გასულ თვეს დონალდ ტრამპმა ამ დებულებებიდან მასშტაბური გამონაკლისი დაუშვა, მას შემდეგ, რაც ვლადიმირ პუტინთან მსოფლიო ბაზრებზე რუსული დიზელის მიწოდებაზე შეთანხმდა.