The Telegraph: ისრაელი არჩევნებში უცხოურ ჩარევას გამოიძიებს

ისრაელის უსაფრთხოების სამსახურებმა მიიღეს დავალება, გამოიძიონ საპარლამენტო არჩევნებში უცხოური ჩარევისა და მასშტაბური გაყალბების შესახებ გავრცელებული ბრალდებები, - წერს ბრიტანული გამოცემა The Telegraph-ი.

ბენიამინ ნეთანიაჰუს პარტია „ლიკუდმა“ განაცხადა, რომ კატარმა და თურქეთმა ფარული კამპანია დააფინანსეს, რომლის მიზანიც ისრაელელი არაბების პარტიებისთვის ხმების რაოდენობის გაზრდა იყო.

ისრაელელ არაბთა მაღალი აქტივობის წყალობით, „გაერთიანებულმა სიამ“ და „რაამმა“ არჩევნებზე მაღალი შედეგები აჩვენეს და 120-ადგილიან ქნესეთში, სავარაუდოდ, 19 მანდატი მოიპოვეს. აღნიშნული შედეგი მათ საკვანძო მოთამაშეებად აქცევს ნეთანიაჰუს მემარჯვენე ბლოკის ჩასანაცვლებელი მთავრობის ფორმირების პროცესში.

ხუთშაბათს ცენტრალური საარჩევნო კომისიის ხელმძღვანელმა შიდა უსაფრთხოების სამსახურს წერილით მიმართა და „ლიკუდის“ ბრალდებების გამოძიება მოსთხოვა.

„ჩემთვის ცნობილი გახდა სერიოზული ეჭვების შესახებ არჩევნებზე არასათანადო ზემოქმედების თაობაზე, რაც ისრაელის ინტერესების საწინააღმდეგოდ მოქმედი უცხოური სუბიექტების დაფინანსებით ხორციელდებოდა. მიუხედავად იმისა, რომ ამ ეჭვების უტყუარობას ვერ დავადასტურებ, მიმაჩნია, რომ რადგან საქმე უცხოურ სუბიექტებს ეხება, არსებობს მათი საფუძვლიანი გამოძიების ვალდებულება“, - განაცხადა უზენაესი სასამართლოს მოსამართლემ და კომისიის ხელმძღვანელმა, ნოამ სოლბერგმა.

ისრაელის პოლიციამ თავდაპირველად განაცხადა, რომ მასშტაბური გაყალბების დამადასტურებელი მტკიცებულებები არ მოეპოვებოდა, ხოლო ებრაული მედიის ცნობით, უწყების წყარომ აღნიშნა, რომ არჩევნების დღემ „დარღვევების გარეშე ჩაიარა“.

თუმცა, მოგვიანებით გავრცელებულ განცხადებაში პოლიციის კომისარმა, დანიელ ლევიმ აღნიშნა: „ნებისმიერი მიღებული საჩივარი და არჩევნების პატიოსნების დარღვევასთან დაკავშირებული ყოველი ეჭვი საფუძვლიანად და მიუკერძოებლად შემოწმდება და გამოიკვლევა“.