ლიეტუვური მედია: ბრიუსელმა უარყო ბალტიისპირეთის ქვეყნების თხოვნა ანტიდრონული თავდაცვის განვითარებისთვის 500 მილიონი ევროს გამოყოფის თაობაზე და სესხის აღება შესთავაზა

ევროკომისიამ უპასუხა ლიეტუვის, ლატვიისა და ესტონეთის თხოვნას ანტიდრონული თავდაცვის განვითარებისთვის 500 მილიონი ევროს გამოყოფის თაობაზე, თუმცა ბალტიისპირეთის ქვეყნებს მათ მიერ მოთხოვნილი მასშტაბის ახალი დაფინანსება არ შესთავაზა.

სექტემბრის ბოლოს სამივე ქვეყნის თავდაცვის მინისტრებმა ევროკომისიას წერილით მიმართეს და დრონებისგან თავდაცვის გასაძლიერებლად სასწრაფო ფინანსური მხარდაჭერა ითხოვეს.

წელს, უკრაინასა და რუსეთს შორის საჰაერო იერიშების ფონზე, ბალტიისპირეთის საჰაერო სივრცეში რამდენიმე დრონი შეიჭრა.

ლიეტუვის თავდაცვის მინისტრი რობერტას კაუნასი, ესტონეთის თავდაცვის მინისტრი მარტინ ჰერემი და ლატვიის თავდაცვის მინისტრი რაივის მელნისი ითხოვდნენ დაფინანსებას ისეთი ანტიდრონული სისტემის შესაქმნელად, რომელიც ევროკავშირის სხვა ქვეყნებისთვისაც შეიძლებოდა ნიმუშად ქცეულიყო.

ბალტიისპირეთის ქვეყნებს იმედი ჰქონდათ, რომ ევროკომისია რეგიონული ანტიდრონული თავდაცვისთვის დამატებით დაფინანსებას წლის ბოლომდე დაამტკიცებდა. მანამდე ევროკომისიამ გამოცემა LRT.lt-ს განუცხადა, რომ ყურადღებით აფასებდა მოთხოვნას და წევრი ქვეყნების წუხილს ძალიან სერიოზულად ეკიდებოდა.

თუმცა, თავდაცვისა და კოსმოსის საკითხებში ევროკომისარმა, ანდრიუს კუბილიუსმა ოთხშაბათს LRT-ს განუცხადა, რომ კომისიამ საპასუხო წერილი უკვე გააგზავნა, მაგრამ ბალტიისპირეთის ქვეყნებისთვის სასურველი დამატებითი დაფინანსების შეთავაზება ვერ შეძლო.

„ახლა ერთ-ერთი შესაძლებლობა SAFE ინსტრუმენტის ფარგლებში არსებული დამატებითი დაფინანსების გამოყენებაა. უახლოეს მომავალში გამოვაცხადებთ ახალ განაცხადს, რადგან პირველი ეტაპის შემდეგ 21 მილიარდი ევრო დარჩა“, - განაცხადა კუბილიუსმა.

ევროპის უსაფრთხოების სამოქმედო ინსტრუმენტმა (SAFE), რომელიც გასულ წელს ამოქმედდა, ევროკავშირის მასშტაბით თავდაცვითი შესყიდვებისთვის 150 მილიარდი ევროს ოდენობის შეღავათიანი სესხები გამოყო.

პროგრამა ითვალისწინებს სესხებს 45 წლამდე დაფარვის ვადითა და 15%-მდე წინასწარი ავანსით. აღნიშნული სესხების დაფინანსება ევროკავშირის დონეზე ხორციელდება, რაც ბლოკის მაღალი, AAA საკრედიტო რეიტინგის უპირატესობით სარგებლობს.