ნიკოლ ფაშინიანი: ჩვენი მიზანია, სომეხ ხალხს ჰქონდეს შესაძლებლობა გადაწყვიტოს, სომხეთი ევრაზიული ეკონომიკური კავშირის წევრად დარჩეს, ევროკავშირის წევრი გახდეს თუ არც ევროკავშირისა და არც ევრაზიული ეკონომიკური კავშირის შემადგენლობაში იყოს

სომხეთის პრემიერ-მინისტრის, ნიკოლ ფაშინიანის განცხადებით, სომხეთის ევროკავშირში გაწევრიანების პერსპექტივა როგორც ევროკავშირის გაფართოების პოლიტიკაზე, ისე სომეხი ხალხის გადაწყვეტილებაზეა დამოკიდებული.

RFI-ს სომხურ რედაქციასთან ინტერვიუში შეკითხვაზე - არის თუ არა სომხეთის საბოლოო მიზანი ევროკავშირის წევრობა და რა ვადებშია ეს შესაძლებელი - ფაშინიანმა აღნიშნა, რომ სომხეთის მთავრობის სტრატეგიული მიზანი ქვეყნისა და მისი ხალხისთვის ალტერნატივების შექმნაა.

პრემიერ-მინისტრმა გაახსენა საზოგადოებას, რომ 2025 წელს, სამოქალაქო ინიციატივის საფუძველზე, მიიღეს კანონი ევროკავშირში სომხეთის გაწევრიანების პროცესის დაწყების შესახებ.

ამასთანავე, მან ხაზგასმით აღნიშნა, რომ მხოლოდ ქვეყნის სურვილი საკმარისი არ არის - გაფართოებასთან დაკავშირებით გადაწყვეტილება თავად ევროკავშირმაც უნდა მიიღოს.

„ჩვენი მიზანია, სომეხ ხალხს ჰქონდეს შესაძლებლობა გადაწყვიტოს - სომხეთი ევრაზიული ეკონომიკური კავშირის წევრად დარჩეს, ევროკავშირის წევრი გახდეს თუ არც ევროკავშირისა და არც ევრაზიული ეკონომიკური კავშირის შემადგენლობაში იყოს. ნებისმიერ შემთხვევაში, ჩვენ სომხეთის რესპუბლიკას იმგვარად გარდავქმნით, რომ იგი ევროკავშირის სტანდარტებთან შესაბამისობაში მოვიდეს“, - განაცხადა ფაშინიანმა.

მისი თქმით, იმ შემთხვევაშიც კი, თუ სომხეთი ევროკავშირის წევრობისთვის სრულად და ობიექტურად იქნება მზად, საკითხი მაინც ორმხრივ მზაობაზე იქნება დამოკიდებული - ევროკავშირის სურვილზე, მიიღოს სომხეთი, და სომხეთის მოსახლეობის არჩევანზე.

ფაშინიანმა ასევე აღნიშნა, რომ ევროპული სტანდარტების სახელმწიფოს ჩამოყალიბება სომხეთისთვის იმ შემთხვევაშიც კი მომგებიანი იქნება, თუ ქვეყანა ევროკავშირის წევრი ვერ გახდება.