იაროსლავ კაჩინსკი უკრაინას იაროსლავ ბრძენის ორდენს დაუბრუნებს

პოლონური პარტია „სამართალი და სამართლიანობის“ ლიდერმა, პოლონეთის დაღუპული პრეზიდენტის ლეხ კაჩინსკის ძმამ, იაროსლავ კაჩინსკიმ განაცხადა, რომ უკრაინას იაროსლავ ბრძენის ორდენს დაუბრუნებს, რომლითაც ის 2022 წელს დააჯილდოვეს. ინფორმაციას პოლონური რადიო ავრცელებს.

განცხადება ორდენის დაბრუნების შესახებ კაჩინსკიმ ქალაქ გდანსკში მიმდინარე კონფერენციაზე გააკეთა, რომელიც უკრაინის აღდგენის საკითხებს ეძღვნება.

„ამ ორდენს დავაბრუნებ. ეს იქნება ჩემი დამოკიდებულების გამოხატვა უკრაინული ელიტების მიმართ და პოლონეთის პრეზიდენტის კაროლ ნავროცკის მკაფიო მხარდაჭერის დადასტურება“, - ციტირებს პოლონური მედია კაჩინსკის.

ცნობისთვის, რამდენიმე დღის წინ პოლონეთის პრეზიდენტმა უკრაინის პრეზიდენტს ვოლოდიმირ ზელენსკის „თეთრი არწივის“ ორდენი ჩამოართვა. ასეთი გადაწყვეტილება განპირობებული იყო იმით, რომ ზელენსკიმ ერთ-ერთ უკრაინულ სამხედრო ქვედანაყოფს „უკრაინის მეამბოხე არმიის გმირების“ სახელი მიანიჭა. პოლონეთში ფიქრობენ, რომ „უკრაინის მეამბოხე არმია“ ვოლინის ტრაგედიასთან არის დაკავშირებული.

მოგვიანებით პროტესტის ნიშნად პოლონეთს სახელმწიფო ჯილდოები უკრაინის ხელისუფლების სხვა წარმომადგენლებმაც დაუბრუნეს.