მედია: აშშ-ის ცენტრალური სადაზვერვო სააგენტოს ყოფილი დირექტორით ჯონ ბრენანით გამოძიებაა დაინტერესებული

ცენტრალური სადაზვერვო სააგენტოს ყოფილმა დირექტორმა ჯონ ბრენანმა მიიღო წერილი, რომლითაც აცნობეს, რომ მისი საქმიანობით მაიამის დიდ ნაფიც მსაჯულთა ფედერალური გამოძიებაა დაინტერესებული. ინფორმაციას ამერიკული მედია ბრენანის ადვოკატზე კენეტ ვაინშტეინზე დაყრდნობით ავრცელებს.

ვაინშტეინის თქმით, გამოძიება „პოლიტიკურად მოტივირებული და ფაქტებისაგან დაცლილია“.

როგორც ამერიკული მედია იუწყება, აშშ-ის იუსტიციის დეპარტამენტი იძიებს, მონაწილეობდა თუ არა ბრენანი რაიმე დანაშაულებრივ ქმედებაში, რომელიც დაკავშირებულია 2016 წლის საპრეზიდენტო არჩევნების დროს აშშ-ის მთავრობის მიერ დონალდ ტრამპის საარჩევნო შტაბის თვალთვალთან და რუსეთის მიერ შეთქმულების შესახებ დაუდასტურებელ ბრალდებებთან.

მედიის ცნობით, ბრენანის წინააღმდეგ გამოძიებას ხელმძღვანელობს ფლორიდის სამხრეთ ოლქის აშშ-ის პროკურორი, ჯეისონ ა. რედინგ კინიონესი.