საფრანგეთის საპრეზიდენტო არჩევნებში ემანუელ მაკრონი ლიდერობს

ფრანგული მედიის ცნობით, საფრანგეთის არჩევნების პირველ ტურში ეგზითპოლის მონაცემების თანახმად ემანუელ მაკრონი და მარინ ლე პენი ლიდერობენ.

ეგზითპოლის შესახებ ცნობას ბელგიური ტელეკომპანია RTBF-იც ავრცელებს. არხის ინფორმაციით, მაკრონს 24%-იანი მხარდაჭერა აქვს, ლე პენს - 22%.

ქვეყნის შსს-ს ცნობით, ადგილობრივი დროით 17:00 საათისთვის ფრანგი ამომრჩევლების აქტივობამ თითქმის 70%-ს მიაღწია. სამინისტროს ცნობით ყველაზე მაღალი აქტივობა საფრანგეთის სამხრეთ რეგიონებშია. პარიზში 17:00 საათისთვის ხმა ამომრჩევლების 64,51%-მა მისცა.   

დღეს საფრანგეთში საპრეზიდენტო არჩევნების პირველი ტური ტარდება. მეორე ტური 7 მაისს გაიმართება. წინასწარი მონაცემების თანახმად მეორე ტურში საფრანგეთის პრეზიდენტობისთვის მაკრონი და ლე პენი იბრძოლებენ.

საფრანგეთის საპრეზიდენტო არჩევნებში 11 კანდიდატი მონაწილეობს. საარჩევნო სიებში 45 მილიონზე მეტი ამომრჩეველია დარეგისტრირებული.