გიორგი დონაძე „იმედის“ პროექტზე „მიმღერე“: დღევანდელი კონცერტი ქართული ხალხური სიმღერის ზეიმი იყო. დიდი მადლობა იდეის ავტორს, მაკა ლომიძეს უპრეცედენტო მხარდაჭერისთვის. მადლობა, „მიმღერეს“ დამფუძნებელს, ქალბატონ ეკა ნაცვლიშვილს. ასევე, მინდა ხაზგასმით აღვნიშნო, რომ უპრეცედენტოა ხელისუფლების მხარდაჭერა ქართული ტრადიციული კულტურის მიმართ
კულტურა

ფოტო: იმედი/ვიდეოკადრი
დღევანდელი კონცერტი ქართული ხალხური სიმღერის ზეიმი იყო, - განაცხადა გადაცემაში „იმედი LIVE“ პროექტ „მიმღერეს“ თანაავტორმა, ფოლკლორის ეროვნული ცენტრის დირექტორმა, გიორგი დონაძემ.
კერძოდ, დღეს ოპერაში „იმედის“ სახალხო შოუს „მიმღერე ქართული ხალხურის“ სეზონის საშობაო შემაჯამებელი კონცერტი გაიმართა. უკვე ხუთი წელია „მიმღერე“ „იმედის“ ეთერშია და მაყურებლის ერთ-ერთი ყველაზე საყვარელი პროექტი გახდა. დღევანდელ კონცერტში მონაწილეობდნენ ფოლკლორული ანსამბლები და სალოტბარო სკოლის აღსაზრდელები. შესრულდა სხვადასხვა კუთხის ის ავთენტური სიმღერები, რომლებიც „მიმღერეს“ მონაწილე ოჯახებს თაობებით გადმოეცა. პროექტის იდეის ერთ-ერთი მთავარი ავტორი ტელეკომპანია „იმედის“ გენერალური დირექტორი მაკა ლომიძეა. „მიმღერეს“ ყველა სეზონს მაყურებელი განსაკუთრებული მოლოდინით ელის და განსაკუთრებული მხარდაჭერა აქვს. საშობაო კონცერტს ესწრებოდნენ პრეზიდენტი, პრემიერი, პარლამენტის თავმჯდომარე, კულტურის მინისტრი, ხელისუფლების წარმომადგენლები, სასულიერო პირები და მოქალაქეები. კონცერტის მხარდამჭერია კულტურის სამინისტრო და ფონდი „ქართული გალობა“.
გიორგი დონაძის თქმით, ძალიან ემოციური დღე იყო.
„მართლაც საოცარი საღამო გამოვიდა. ზოგადად, „მიმღერე“ არის ერთ-ერთი ყველაზე საუკეთესო და საყვარელი პროექტი მთელი ქვეყნის მასშტაბით. ყველას უყვარს და ეს, „მიმღერე ქართული ხალხური“, მართლაც ისეთი ემოციური იყო, ძალიან მნიშვნელოვანი იყო ოჯახების ჩართულობა. თქვენ მაკა ლომიძე ახსენეთ, მისი იდეა იყო ეს ყველაფერი და მადლობა მინდა ვუთხრა უპრეცედენტო მხარდაჭერისთვის. ასეთი წარმოჩენა, ქართულ მრავალხმიანობას, განსაკუთრებით ოჯახებს, ასეთი წარმოჩენა სალოტბარო სკოლებს არ ჰქონია. მადლობა მინდა ვუთხრა „მიმღერეს“ დამფუძნებელს, ქალბატონ ეკა ნაცვლიშვილს.
დღევანდელ კონცერტს რაც შეეხება, ეს იყო ქართული ხალხური სიმღერის ზეიმი. წარმოიდგინეთ, რამდენი თაობა იდგა. ოჯახები, გვარები, სალოტბარო სკოლების ბავშვები, უფროსი თაობის წარმომადგენლები სხვადასხვა კუთხიდან. ოთხი თაობა იდგა დღეს ოპერის სცენაზე. ესეც მინდა ხაზგასმით აღვნიშნო, რომ უპრეცედენტოა მთავრობის, ხელისუფლების მხარდაჭერა ქართული ტრადიციული კულტურის მიმართ“, - აღნიშნა მან.





