თემურ დადიანი ჰენრი უორსლის ჯილდოს მფლობელი გახდა

საქართველოს თავდაცვის სამინისტროს დაჭრილ-დაშავებულ სამხედრო მოსამსახურეს, პარაოლიმპიელსა და „ძლიერთა თამაშების“ (Invictus Games) მონაწილე თემურ დადიანს, „დაუმარცხებელი სულის ჯილდოს“ (Invictus Spirit Awards) პირველი დაჯილდოების ფარგლებში, ჰენრი უორსლის ჯილდო გადაეცა.

აღნიშნული ჯილდო ენიჭება ადამიანს, რომელმაც მნიშვნელოვანი მიღწევების გზაზე განსაკუთრებული სიმტკიცე და შეუპოვრობა გამოავლინა, დაეხმარა სხვებს საკუთარი პოტენციალის რეალიზებაში, დაძლია სირთულეები და ხელი შეუწყო სპორტის განვითარებას, როგორც რეაბილიტაციის საშუალებას.

ავღანეთის სამშვიდობო მისიაში სამსახურისას მიღებული მძიმე დაზიანებების შემდეგ თემურ დადიანმა სპორტის საშუალებით აღიდგინა ფიზიკური ძალა და ფსიქოლოგიური მდგრადობა. იგი „ძლიერთა თამაშების 2025“ წლის ოქროს მედალოსანია, მსოფლიო და ევროპის ჩემპიონია პარამკლავჭიდში, გინესის რეკორდი ორჯერ აქვს დამყარებული “აზიდვებში” და საქართველოს პირველი ზამთრის პარაოლიმპიელია თხილამურებით შეჯიბრებაში. მას მონაწილეობა აქვს მიღებული ზამთრის რამდენიმე პარაოლიმპიურ თამაშში.

თემურ დადიანი, როგორც ადაპტირებული სპორტის სპეციალისტი, თანამებრძოლების, მათ შორის მძიმე დაზიანებების მქონე პირთა აქტიური მხარდამჭერია სპორტისა და რეაბილიტაციის პროცესში.

დაჯილდოების ცერემონია 2026 წლის 17 სექტემბერს ლონდონში, „სამეფო საზღვაო კოლეჯში“ გაიმართა. ჯილდო თემურ დადიანს სასექსის ჰერცოგმა პრინცმა ჰარიმ, ასევე მაქს და ალისია უორსლიმ გადასცეს.

ინფორმაციას საქართველოს თავდაცვის სამინისტრო ავრცელებს.