სპორტის მინისტრის მოადგილემ, ირაკლი დოლაბერიძემ იაპონიაში ბუდოს საერთაშორისო უნივერსიტეტში სამუშაო შეხვედრა გამართა

საქართველოს სპორტის სამინისტროს წარმომადგენლები იაპონიაში სამუშაო ვიზიტით იმყოფებიან.

სამინისტროს ინფორმაციით, ვიზიტის ფარგლებში სპორტის მინისტრის მოადგილემ, ირაკლი დოლაბერიძემ, ბუდოს საერთაშორისო უნივერსიტეტში რექტორთან, პროფესორ კანტარო მაცუისთან და ჩიბას პრეფექტურის ქალაქ კატსუროს მერთან, იუმიკო ტერუკავასთან, შეხვედრა გამართა.

შეხვედრაზე მხარეებმა ქართველი სპორტსმენებისა და სტუდენტების ერთობლივი საწვრთნელი ბანაკებისა და გაცვლითი პროგრამების შესახებ იმსჯელეს. განსახილველი საკითხები მოიცავდა სასპორტო განათლებისა და მეცნიერების კუთხით თანამშრომლობას, გამოცდილების გაზიარებას, მაღალი მიღწევების სპორტში შედეგების ზრდისას სასწავლო-საწვრთნელი პროცესის დაგეგმვის საკითებს. საუბარი ასევე შეეხო სპორტის მენეჯმენტს, სპორტის პოლიტიკის შემუშავებასა და სტრატეგიის განვითარებას, ასევე სპორტული მედიცინისა და რეაბილიტაციის საკითხებს.

ვიზიტის ფარგლებში ბუდოს საერთაშორისო უნივერსიტეტში საჩვენებელი ვარჯიშები ძიუდოში, კარატესა და ეროვნული მშვილდოსნობის სახეობა კიუდოში მოეწყო. ბუდოს საერთაშორისო უნივერსიტეტმა, რომელიც ძირითადად ინდივიდუალურ საბრძოლო სპორტის სახეობაზეა ორინტირებული, იაპონიის მრავალი ცნობილი სპორტსმენი, მწვრთნელი და სპეციალისტი აღზარდა.