რევაზ სოხაძე: აბასთუმანში ადრე რეაბილიტირებულ ობიექტებზე არსებული ხარვეზები გამოსწორდება

რეგიონული განვითარებისა და ინფრასტრუქტურის მინისტრი რევაზ სოხაძე, მუნიციპალური განვითარების ფონდის აღმასრულებელ დირექტორთან, გიორგი შონიასთან და ადგილობრივი თვითმმართველობის წარმომადგრნლებთან ერთად, აბასთუმანში მიმდინარე და დაგეგმილ სარეაბილიტაციო პროექტებს გაეცნო.

მინისტრმა დაათვალიერა ობიექტები, სადაც სამუშაოები მიმდინარეობს.

რევაზ სოხაძის განცხადებით, აბასთუმანში რამდენიმე წლის წინ რეაბილიტირებულ ცალკეულ ობიექტებზე პრობლემები კვლავ არსებობს და სამინისტრო გამოსწორებას გეგმავს.

„სამწუხაროდ, იმ ობიექტებზე, სადაც რამდენიმე წლის წინ სარეაბილიტაციო სამუშაოები ჩატარდა, კვლავ არსებობს გარკვეული პრობლემები. ჩვენ მოსახლეობას დავპირდით, რომ ამ ხარვეზებს აუცილებლად გამოვასწორებთ. ამისთვის საჭიროა სამუშაოების სწორად დაგეგმვა, რასაც გარკვეული დრო სჭირდება, თუმცა შესაბამისი სამუშაოები უახლოეს პერიოდში დაიწყება“, - განაცხადა მინისტრმა.

აბასთუმანში მიმდინარეობს საცხოვრებელი სახლებისა და ისტორიული შენობების რეაბილიტაცია. ამჟამად სამუშაოები რუსთაველის, ასათიანისა და ფალიაშვილის ქუჩებზე, 16 მისამართზე ხორციელდება.

ამასთან, მზადდება სარეაბილიტაციო სამუშაოების ახალი ეტაპი, რომელიც ითვალისწინებს შენობების აღდგენასა და საზოგადოებრივი სივრცეების განვითარებას. დაგეგმილია როშა პარკის გაფართოება, რუსთაველის ქუჩაზე ამფითეატრის, ხოლო ასათიანის ქუჩაზე საფეხმავლო ბილიკებისა და ბულვარის ტიპის სასეირნო სივრცის მოწყობა.

მინისტრი ახალციხეში სპორტული ინფრასტრუქტურის პროექტებსაც გაეცნო. ქალაქში მიმდინარეობს ტექნიკური საფეხბურთო სტადიონის მშენებლობა და დაგეგმილია არსებული სტადიონის რეაბილიტაცია.

მინისტრის განცხადებით, ტექნიკური საფეხბურთო მოედნების პროექტები რეგიონის სხვა მუნიციპალიტეტებშიც - ახალქალაქში, ნინოწმინდაში, ადიგენში, ბორჯომსა და ასპინძაშიც ხორციელდება.