სტიქია კახეთში - ძლიერი წვიმის შედეგად მდინარეები ადიდდა და კალაპოტიდან გადმოვიდა. დატბორილია ნაკვეთები, დაზიანებულია ინფრასტრუქტურა

კახეთში, ინტენსიური წვიმის შედეგად, რამდენიმე მუნიციპალიტეტში მდინარეები ადიდდა, რის გამოც დაზიანდა ინფრასტრუქტურა და დაიტბორა ნაკვეთები.

რთული ვითარებაა ლაგოდეხის მუნიციპალიტეტში. განსაკუთრებით კი სოფლებში ჭიაურსა და ქვემო ნაშოვარში. ადგილზე მობილიზებულია ყველა შესაბამისი სამსახური.

სტიქიის ზონაში ჩავიდნენ კახეთის მხარეში სახელმწიფო რწმუნებული და ლაგოდეხის მერი.

„ბოლო რამდენიმე დღის განმავლობაში მოსულმა უხვმა ნალექმა და ადიდებულმა მდინარეებმა შექმნეს პრობლემა კახეთის რვა მუნიციპალიტეტიდან ექვსში. განსაკუთრებული იყო პრობლემათა რაოდენობა გურჯაანში, ლაგოდეხსა და ყვარელში. ჩვენ ყველა პრობლემის საქმის კურსში ვართ. იქ, სადაც შეიძლებოდა მყისიერი რეაგირება, ჩართული ვართ და ვახორციელებთ სტიქიის სალიკვიდაციო სამუშაოებს. სადაც წყლის დონე არ გვაძლევდა აღნიშნულის საშუალებას, როგორც კი დაიკლებს წყლის დონე, ჩვენ შევაფასებთ აუცილებლად იქ მოცემულობას და დავიგეგმებით, როგორც სალიკვიდაციო, ასევე, საპრევენციო სამუშაოებზე“, - განაცხადა კახეთის მხარეში სახელმწიფო რწმუნებულმა პლატონ კალმახელიძემ.