იმერეთში ე.წ. „საღორიის ტყის“ აღდგენასა და გაჯანსაღებაზე იმსჯელეს

საქართველოს ეროვნული სატყეო პროგრამის ფარგლებში, ქუთაისში სამუშაო ჯგუფის შეხვედრა გაიმართა. გარემოს დაცვისა და სოფლის მეურნეობის მინისტრის მოადგილემ, იური ნოზაძემ, საკანონმდებლო ორგანოს, გარემოსდაცვითი არასამთავრობო ორგანიზაციებისა და სამეცნიერო წრეების წარმომადგენლებს ქუთაისის მუხნარში არსებული მდგომარეობა, განხორციელებული და დაგეგმილი ღონისძიებები ადგილზე გააცნო.

შეხვედრას იმერეთის მხარის რწმუნებული, ზვიად შალამბერიძე და ადგილობრივი თვითმმართველობის წარმომადგენლები ესწრებოდნენ.

ქუთაისის მიმდებარედ არსებულ მუხნარში, რომელიც „საღორიის ტყის” სახელით არის ცნობილი, ენდემური და წითელი ნუსხის სახეობა „იმერული მუხა” გვხვდება. უკანონო ჭრებმა, ნარჩენებით დაბინძურებამ და სხვა მსგავსმა უარყოფითმა ფაქტორებმა, რომლებიც აღნიშნულ ტერიტორიაზე ათწლეულების პრობლემაა, ტყის მასივი მნიშვნელოვნად დააზიანა. გარდა ამისა, ტერიტორიაზე მოიშალა არსებული სადერივაციო არხი, რამაც გამოიწვია ტყის ნაწილობრივი დატბორვა. ყოველივე ზემოაღნიშნულის პარალელურად, მუხნარში გავრცელდა მსოფლიოში მოწყვლადის სტატუსით ცნობილი მავნებელი ხოჭო - მუხის დიდი ხარაბუზა.

„საღორიის ტყეში” არსებული მდგომარეობის გამოსასწორებლად, სპეციალისტების მიერ შემუშავდა კომპლექსური ღონისძიებების გეგმა, რომელიც სანიტარიულ ჭრებს, მავნებლის მიერ დაზიანებული ხეების კორომიდან გამოტანას, ნარჩენებისაგან გაწმენდას და ტყის აღდგენას მოიცავს. ეროვნული სატყეო სააგენტო აღნიშნულ ღონისძიებებს 2017 წლიდან ახორციელებს. 2.4 ჰა ფართობზე 9500 ცალი იმერული მუხის და ჩვეულებრივი იფნის ნერგი დაირგო. ტყის აღდგენის მასშტაბების გაზრდის მიზნით, 2019 წელს, დამატებით მომზადდა ტყის აღდგენის 2 პროექტი, ჯამში, 20.3 ჰა ფართობზე. აღნიშნული პროექტები ბუნებრივი განახლების ხელშეწყობის ღონისძიებებსაც ითვალისწინებს.

2020 წელს, მოზარდ-აღმონაცენის დასაცავად (ძირითად შემთხვევებში, საძოვრად გაშვებული საქონლისგან), ტერიტორია შეიღობა. 2021 წელს, 11 ჰა ფართობისთვის მომზადდა ტყის ბუნებრივი განახლების ხელშეწყობით აღდგენის პროექტი. მიმდინარე და დაგეგმილი ღონისძიებების მიზანი ამ უნიკალური კორომის სანიტარიული მდგომარეობის გაუმჯობესება და გაჯანსაღებაა.