ლევან მახაშვილი: ყველას თავისი გზა აქვს გასავლელი და ჩვენ ამ გზას აუცილებლად გავივლით, ოღონდ ეს გზა გადის არა კაია კალასის თუ მარტა კოსის განცხადებებზე, არამედ საქართველოს ეროვნულ ინტერესებზე

ვხედავთ, რომ წევრ ქვეყნებში ამისი [ვიზალიბერალიზაციის შეჩერების] მზაობა არ არის. არათუ გამკაცრების, არამედ პირიქით შერბილებისა და პოლიტიკური დიალოგის დაწყების მცდელობაა, - განაცხადა გადაცემაში „იმედი LIVE“ ევროპასთან ინტეგრაციის საპარლამენტო კომიტეტის თავმჯდომარემ ლევან მახაშვილმა.

დეპუტატის თქმით, საქართველო ევროკავშირისგან სამართლიან და ობიექტურ მიდგომას ითხოვს.

„უცხოური ჩარევების გამო ჩვენ ვიხილეთ არაერთი ელჩის გაძევება ევროკავშირში, ყველაფერს რომ თავი დავანებოთ, ერთ-ერთ ქვეყანაში არჩევნები გააუქმეს უცხოური ჩარევების გამო. არაფერს განსაკუთრებულს არ ვითხოვთ ბრიუსელისგან, ვითხოვთ სამართლიან, ობიექტურ მიდგომას ურთიერთთანასწორობის ნიადაგზე და ამ ფორმით მზად ვარ ვისაუბროთ ნებისმიერ ფორმატში, ნებისმიერ საკითხზე. თბილისი მზად არის დიალოგისთვის იმ მიზნით, რომ პრობლემური საკითხები მოვაგვაროთ და სადაც შესაძლებელია, კომპრომისებზე წავიდეთ“, - აღნიშნა მან.

მახაშვილმა ასევე უპასუხა ევროკავშირის გაფართოების კონტექსტში მოლდოვა-უკრაინასთან დაკავშირებით დასმულ კითხვას.

„მე არ მინდა, რომ ბევრი ვისაუბრო ამ ქვეყნებზე, ჩვენი მოსახლეობა კარგად ხედავს რაც ხდება იქ, ჩვენ არავის ვედრებით, მხოლოდ მაშინ ვცდილობთ ამ შედარებების გაკეთებას, როდესაც ნეგატიურ კონტექსტში გვადარებენ ხან უკრაინას, ხან მოლდოვას, ყველას თავისი გზა აქვს გასავლელი და ჩვენ ამ გზას აუცილებლად გავივლით, ოღონდ ეს გზა გადის არა კაია კალასის თუ მარტა კოსის განცხადებებზე, არამედ საქართველოს ეროვნულ ინტერესებზე“, - აღნიშნა მახაშვილმა.