ლევან მახაშვილი საკონსტიტუციო სარჩელზე: ეს არის ხალხის პასუხი იმ დესტრუქციასა და დანაშაულებზე, რაც კოლექტიურმა „ნაცმოძრაობამ“ დამართა ხალხს. არის ორი არჩევანი. ერთი არის ლინჩის წესით გასამართლება, რაც ჩვენთვის, როგორც დემოკრატიული სახელმწიფოსთვის, მიუღებელია. და მეორე გზა - სამართლებრივი პასუხი იმ დანაშაულებზე, რასაც ვხედავთ ორი ათწლეულია საქართველოში

ეს არის ხალხის პასუხი იმ დესტრუქციასა და დანაშაულებზე, რაც კოლექტიურმა „ნაციონალურმა მოძრაობამ“ დამართა ხალხს და ქვეყანას მთელი ამ წლების განმავლობაში, - განაცხადა „დღის ქრონიკასთან“ ევროპასთან ინტეგრაციის კომიტეტის თავმჯდომარემ ლევან მახაშვილმა საკონსტიტუციო სასამართლოში მიმდინარე განხილვებთან დაკავშირებით.

მისი თქმით, როგორც არ უნდა ეცადოს ოპოზიცია ყურადღება გადაიტანოს არასამართლებრივ საკითხებზე, საზოგადოებამ კარგად იცის, თუ რა დანაშაული მიუძღვით რადიკალებს ქვეყნის წინაშე.

„როგორც არ უნდა სცადონ, რომ ამ პროცესიდან გადაგვიყვანონ, ვითომ არგუმენტებით გააზავონ არათემატური საკითხები, საზოგადოება თვალს ადევნებს სამართლებრივ კონსტიტუციურ პროცესს, რომლის მიზანიც არის ერთადერთი და ეს იყო ჩვენი საკონსტიტუციო სარჩელის მთავარი კითხვაც, ეს უფლება ჯერ კიდევ 1995 წელს კონსტიტუციაში იყო ჩადებული, რომ როდესაც ქვეყანაში არიან ძალები, რომლებიც პირდაპირ გასულები არიან კონსტიტუციური ჩარჩოდან და სისტემატურად არღვევენ კონსტიტუციურ ნორმებს, ჩვენ გვაქვს ვალდებულება საკონსტიტუციო სასამართლოს ძალით, სამართლებრივად ეს ძალები გავიყვანოთ პოლიტიკური პროცესიდან.

არის ორი არჩევანი. ერთი არის არასამართლებრივი მეთოდებით - ლინჩის წესით გასამართლება, რაც რა თქმა უნდა ჩვენთვის, როგორც სამართლებრივი და დემოკრატიული სახელმწიფოსთვის, მიუღებელია. და მეორე გზა არის სამართლებრივი პასუხი იმ დანაშაულებსა და დესტრუქციაზე, რასაც ვხედავთ ორი ათწლეულია საქართველოში“, - განაცხადა ლევან მახაშვილმა.

მისივე თქმით, სასამართლოზე საზოგადოება ისმენს არაფრისმთქმელ, არასამართლებრივ განმარტებებს რადიკალების მხრიდან.

„მაქსიმალურად ვერიდებით ზედმეტ პათეტიკას, ზედმეტ პოლიტიკურ შეფასებებს. არის კონკრეტული სამართლებრივი სარჩელი, სამართლებრივი არგუმენტები კონკრეტული პარტიების მიმართ, რომლებზეც მათი მხრიდან სამართლებრივი არგუმენტები ვერ მოვისმინეთ“, - აღნიშნა ლევან მახაშვილმა.