თორნიკე ჭეიშვილი: გვაქვს ძალიან პოზიტიური მოლოდინი იმასთან მიმართებით, რომ კიდევ უფრო გაღრმავდება და განვითარდება, სავაჭრო-ეკონომიკური და პოლიტიკური ურთიერთობები სინგაპურთან, ისევე როგორც სხვა აზიურ სახელმწიფოებთან

ჩვენი სახელმწიფოს დატვირთვა უპირველესად გამომდინარეობს ჩვენი ქვეყნის სტრატეგიული მდებარეობიდან და მგონი უკვე საყოველთაოდ აღიარებული ფაქტია, განსაკუთრებით ბოლო დროს განვითარებული მოვლენების გათვალისწინებით, რომ სატრანსპორტო დერეფანი, რომელიც საქართველოზე გადის, არის ერთ-ერთი ყველაზე სტაბილური მარშრუტი საერთაშორისო გადაზიდვების განსახორციელებლად, ტვირთბრუნვის წარმოებისთვის, - განაცხადა თორნიკე ჭეიშვილმა „დღის ქრონიკაში“.

იურიდიულ საკითხთა საპარლამენტო კომიტეტის თავმჯდომარის პირველმა მოადგილემ ხაზი გაუსვა აზიურ ქვეყნებთან, მათ შორის ჩინეთთან მჭიდრო კავშირების განვითარების მნიშვნელობას და ამ ქვეყნებში საქართველოს მთავრობის წარმომადგენლების ვიზიტებზე ისაუბრა. დეპუტატის თქმით, ამ ფონზე არსებობს წინაპირობა საქართველოსა და სინგაპურის ურთიერთობების გაღრმავებისთვის.

„შესაბამისად, ყველანაირი წინაპირობა არის იმისთვის, რომ ახლა უკვე სინგაპურიც იყოს დაინტერესებული იმ პერსპექტივით, რასაც ქმნის საქართველო, როგორც დაკავშირებადების ფუნქციის მქონე სახელმწიფო, როგორც ასევე ერთგვარი ლოგისტიკური თუ სატრანსპორტო ჰაბი რეგიონში. რა თქმა უნდა, გვაქვს ძალიან პოზიტიური მოლოდინი იმასთან მიმართებით, რომ კიდევ უფრო გაღრმავდება და განვითარდება, სავაჭრო-ეკონომიკური და პოლიტიკური ურთიერთობები სინგაპურთან, ისევე როგორც სხვა აზიურ სახელმწიფოებთან“, - განაცხადა ჭეიშვილმა.