ნიკოლოზ სამხარაძე: მოსალოდნელი იყო, რომ ამ საქმის ყველა ფიგურანტი იტყოდა, თითქოს მათ არ მიუციათ ინტერვიუ BBC-ისთვის, ან ამ ფორმით არ უთქვამთ, რომ ნამდვილად იყო ქიმიური იარაღი გამოყენებული

მოსალოდნელი იყო, რომ ამ საქმის ყველა ფიგურანტი იტყოდა, რომ მათ არ მიუციათ ინტერვიუ BBC-ისთვის, ან ამ ფორმით არ უთქვამთ, რომ ნამდვილად იყო ქიმიური იარაღი გამოყენებული, - განაცხადა საგარეო ურთიერთობათა საპარლამენტო კომიტეტის თავმჯდომარემ ნიკოლოზ სამხარაძემ.

მისივე თქმით, ეს საქმე თავიდანვე არის თეთრი ძაფით ნაკერი.

„მთავარი იდეა და მიზანი იყო, რომ საქართველოს ხელისუფლებისთვის კიდევ ერთხელ მიეყენებინათ ზიანი. ხელისუფლებამ უკვე განაცხადა, რომ ამაზე იჩივლებს სასამართლოში, სასამართლოზე იქნება წარმოდგენილი ის მტკიცებულებები, რომელიც ჩვენს მხარეს გაამართლებს და BBC-ისა და მის ჟურნალისტს მოუწევს უარყოფა იმ ყველაფრის, რაც მან ასე უზნეოდ გაავრცელა“, - აღნიშნა ნიკოლოზ სამხარაძემ.

ცნობისთვის, BBC-მ გამოაქვეყნა სტატია, რომელშიც საუბარია იმაზე, რომ „ქართული ოცნების“ ხელისუფლებამ აქციაზე პირველი მსოფლიო ომის დროინდელი ქიმიური იარაღი გამოიყენა. BBC-ის გამოძიების თანახმად, 2024 წლის პროტესტებისას გამოყენებულ წყლის ჭავლში სავარაუდოდ შერეული იყო ტოქსიკური ქიმიური აგენტი „კამიტე“ - ბრომობენზილ ციანიდი.

„ქართული ოცნება“ BBC-ის წინააღმდეგ საერთაშორისო სასამართლოებში სამართლებრივ დავას იწყებს. ამასთან, სახელმწიფო უსაფრთხოების სამსახურმა BBC-ის მიერ საჯარო სივრცეში დანაშაულის შესახებ გავრცელებულ ინფორმაციასთან დაკავშირებით გამოძიება დაიწყო.