ზაურ დარგალი: ვრცელდება ინფორმაცია, რომ „ნაციონალური მოძრაობა“ შულავერის ადმინისტრაციულ ერთეულში სააკაშვილის ჩამოსვლის მოთხოვნით გზის გადაკეტვას გეგმავს

საპარლამენტო უმრავლესობის წევრის, ზაურ დარგალის განცხადებით, მარნეულში ოპოზიციის მხრიდან პროვოკაციებია მოსალოდნელი.

აღნიშნულთან დაკავშირებით, მარნეულის მუნიციპალიტეტის მაჟორიტარმა, ზაურ დარგალმა „ქართული ოცნების“ ადგილობრივი ორგანიზაციის ოფისში საგანგებო განცხადება გააკეთა.

„ვრცელდება ინფორმაცია, რომ „ნაციონალური მოძრაობა“ შულავერის ადმინისტრაციულ ერთეულში გეგმავს აქციას, გზის გადაკეტვას მიხეილ სააკაშვილის ჩამოსვლის მოთხოვნით. ეს გახლავთ „ნაციონალური მოძრაობის“ მხრიდან წინასაარჩევნოდ დაგეგმილი დესტრუქციული და პროვოკაციული ქმედებების გაგრძელება“, – განაცხადა დარგალმა.

„ქართული ოცნების“ წევრები მოსახლეობას მოუწოდებენ, არ აჰყვნენ კანონსაწინააღმდეგო ქმედებებს და არ გადაკეტონ ცენტრალური მაგისტრალი, რადგან ქმედებამ შესაძლოა, მოსახლეობაში დაპირისპირების მიზეზი გახდეს.

დარგალის თქმით, იმ შემთხვევაში, თუ მსგავს ქმედებას ექნება ადგილი, სამართალდამცავები ადეკვატურ ზომებს მიიღებენ.

ამასთან, „ერთიანი ნაციონალური მოძრაობის“ ადგილობრივ ოფისში აღნიშნულ ინფორმაციას უარყოფენ და აცხადებენ, რომ იგი სიმართლეს არ შეესაბამება. თუმცა, ადგილობრივი ორგანიზაციის ხელმძღვანელის, გიორგი მუმლაძის განმარტებით, თუ მოსახლეობა საკუთარი აზრის დაფიქსირებას და რაიმე ფორმით პროტესტის გამოხატვას გადაწყვეტს, ეს მათი კონსტიტუციური უფლებაა და ხელი არ უნდა შეუშალონ.

„არანაირი აქციის ჩატარებას არ ვგეგმავთ. უფრო მეტიც, ერთ საათში დასავლეთ საქართველოში მივემგზავრები. თუ მოსახლეობა გადაწყვეტს რაიმე ფორმით აზრის დაფიქსირებას, ეს მათი კონსტიტუციური უფლებაა“, – განაცხადა გიორგი მუმლაძემ.