ნინო წილოსანი ბუკნარის მოვლენებზე: ნებისმიერი ადამიანის მხრიდან, მსგავსი ქმედება იქნება ანტისახელმწიფოებრივი და სათანადოდ დაიგმობა

უსიამოვნება, რომელიც ბუკნარში მოხდა, უნდა იყოს ძალიან მალე აღმოფხვრილი, თუმცა, ამასთანავე თითოეულ ჩვენგანს გვეკისრება პასუხისმგებლობა, რომ გამოვიყენოთ ყველაფერი, რათა ვიპოვოთ მშვიდობიანად თანაცხოვრების გზები და არა ის, როგორ დავძაბოთ სიტუაცია. ნებისმიერი ადამიანის მხრიდან მსგავსი ქმედება იქნება ანტისახელმწიფოებრივი და იქნება სათანადოდ დაგმობილი როგორც ეს საჭიროა და როგორც ამას იმსახურებს, - ამის შესახებ ჟურნალისტებს საქართველოს პარლამენტის წევრმა ნინო წილოსანმა სოფელ ბუკნარში განუცხადა.

„დღევანდელმა ინციდენტმა ცხადყო, რომ არიან ალბათ, ადამიანები ვისაც სურთ, რომ ამ ფაქტით ისარგებლონ და სხვადასხვა პროვოკაცია მოაწყონ. კიდევ ერთხელ მინდა ვთხოვო ყველას, რომ შეეცადონ და მაქსიმალურად აერიდონ პროვოკაციებს და რაც მთავარია, იაზროვნონ სახელმწიფოებრივად. ჩვენ ვართ ქვეყანა, სადაც ყველა რელიგიის წარმომადგენელს აქვს რწმენის და რელიგიის თავისუფლება. ჩვენ ამ ისტორიულ-კულტურული მოცემულობით მოვდივართ და არავის მივცემთ იმის საშუალებას, რომ ეს მშვიდობიანი თანაცხოვრება არიოს“, - განაცხადა ნინო წილოსანმა.

სოფელ ბუკნარში ქრისტიანი და მუსლიმი თემი შესარიგებელი შეხვედრისთვის ემზადება. ახლა მართლმადიდებლურ ტაძარსა და მეჩეთში ლოცვის რიტუალი ერთდროულად ტარდება, რის შემდეგაც მხარეები ადგილობრივი ხელისუფლების და სასულიერო პირების მონაწილეობით შერიგებაზე ისაუბრებენ და თანაცხოვრებასთან დაკავშირებულ თემებს განიხილავენ.

რელიგიურ ნიადაგზე დაპირისპირების რისკები ამ დროისთვის შემცირებულია, თუმცა დღეს სოფლის ცენტრში ხმაური მაინც იყო. ამ შემთხვევაში, კონფლიქტის მონაწილეები არა სხვადასხვა თემის წარმომადგენლები, არამედ პოლიტიკოსები იყვნენ. „ნაციონალური მოძრაობის“ წევრი ბესიკ ქათამაძე, სოფლის ცენტრში, მაჟორიტარ დეპუტატ ვასილ ჩიგოგიძეს დაუპირისპირდა და მომხდარში ხელისუფლება დაადანაშაულა. იყო შეხლა-შემოხლა. დაპირისპირებაში ადგილობრივებიც ჩაერთვნენ. ქათამაძე პროვოკაციაში დაადანაშაულეს, ის ტერიტორიიდან პოლიციამ გაიყვანა.

ჩოხატაურის მუნიციპალიტეტის სოფელ ბუკნარში უთანხმოება მუსლიმ და ქრისტიან მოქალაქეებს შორის 2 დღის წინ დაიწყო. კონკრეტულად, მუსლიმი თემის წარმომადგენლები სოფელში სალოცავის მოწყობას ითხოვენ, ქრისტიანული თემის წევრები კი ამის წინააღმდეგნი არიან. აზრთა სხვადასხვაობა ფიზიკურ დაპირისპირებაშიც გადაიზარდა. ფაქტზე შსს-მ ერთი პირი დააკავა.

ჩოხატაურის მერიაში დაპირისპირებული მხარეების შეხვედრის შემდეგ მათ განაცხადეს, რომ შეთანხმება მიღწეულია.