ზვიად შალამბერიძე ჩეხეთში ვიზიტზე: ასეთი პლატფორმები, როდესაც შეგვიძლია პირადად ვესაუბროთ ჩვენს კოლეგებს, გვაძლევს იმის საშუალებას, რომ კონკრეტულად და პირადად გავაცნოთ ის მდგომარეობა, რაც ჩვენს ქვეყანაშია

ასეთი პლატფორმები, როდესაც შეგვიძლია პირადად ვესაუბროთ ჩვენს კოლეგებს, გვაძლევს იმის საშუალებას, რომ კონკრეტულად და პირადად გავაცნოთ ის მდგომარეობა, რაც ჩვენს ქვეყანაშია, - განუცხადა ქართველ ჟურნალისტებს ჩეხეთში ვიზიტთან დაკავშირებით რეგიონული პოლიტიკისა და თვითმმართველობის საპარლამენტო კომიტეტის თავმჯდომარის პირველმა მოადგილემ ზვიად შალამბერიძემ.

კერძოდ, საქართველოს პარლამენტის თავმჯდომარე, საპარლამენტო დელეგაციასთან ერთად, ოფიციალური ვიზიტით ჩეხეთის რესპუბლიკაში იმყოფება. დღეს დაგეგმილია მაღალი დონის შეხვედრები ჩეხეთის რესპუბლიკის საკანონმდებლო და აღმასრულებელი ხელისუფლების წარმომადგენლებთან.

„ყოველთვის, როდესაც ევროკავშირის თუ ევროპარლამენტის რეზოლუცია ქვეყნდება, ვამბობთ ერთ რამეს, რომ ნებისმიერი დასკვნა დამყარებული უნდა იყოს მხოლოდ და მხოლოდ ფაქტებზე და იმ რეალობაზე, რაც ქვეყანაში გვაქვს. არ უნდა იყოს მხოლოდ არასამთავრობო ორგანიზაციების მხრიდან გაგზავნილ დასკვნებზე დაყრდნობით. ასეთი პლატფორმები, როდესაც შეგვიძლია პირადად ვესაუბროთ ჩვენს კოლეგებს, სწორედ გვაძლევს იმის საშუალებას, რომ კონკრეტულად და პირადად გავაცნოთ ის მდგომარეობა, რაც ჩვენს ქვეყანაშია“, - აღნიშნა ზვიად შალამბერიძემ.