ლავროვი: მედიის მიერ მოგონილი ამბავი ცინიკურია

რუსეთის საგარეო საქმეთა მინისტრი ცინიკურს უწოდებს მოსაზრებას, რომ სანქტ-პეტერბურგის ტერაქტი სირიის გამო რუსეთზე შურისძიება იყო - იუწყება ТАСС-ი. 

"მედიის მიერ მოგონილი ამბავი ცინიკურია. სამწუხაროა, რომ მსგავსი მოსაზრებები აქვს ზოგიერთ მოღვაწეს, პენტაგონის წარმომადგენლების ჩათვლით", - ამბობს სერგეი ლავროვი.

ბოლო მონაცემებით, ტერაქტს 14 ადამიანი ემსხვერპლა. დაშავებულია 51 ადამიანი.

რუსეთში სამდღიანი გლოვაა გამოცხადებული. რუს ხალხს მსოფლიო ლიდერები უსამძიმრებენ. ვლადიმერ პუტინს დონალდ ტრამპმა დაურეკა.

აფეთქება 3 აპრილს 15:00 საათზე, ორ მეტროსადგურს შორის მოძრავ მატარებელში მოხდა. მემანქანემ შემადგენლობა გვირაბში არ გააჩერა.

ტერაქტი 22 წლის აკბარჟონ ჟალილოვმა მოაწყო. მისი ვინაობა ყირგიზეთის უშიშროების სამსახურმა დაადასტურა.

ჟალილოვმა რუსეთის მოქალაქეობა მიიღო და სანქტ-პეტერბურგში ცხოვრობდა. მას კავშირი ჰქონდა სირიელ ტერორისტებთან.

გამოძიება თანამზრახველების დადგენაზე მუშაობს.

რაც შეეხება მეორე ეჭვმიტანილს, რომლის ფოტოც მედიაში გავრცელდა, ყაზახია. ის პოლიციაში მივიდა და განაცხადა, რომ ტერაქტთან კავშირი არ აქვს.

გვიან ღამით ტერაქტის ადგილზე ვლადიმერ პუტინი მივიდა.

რუსეთის პრეზიდენტმა სპეცსამსახურების ხელმძღვანელებთან თათბირი გამართა. სპეცსამსახურებისთვის მოსალოდნელი ტერაქტის შესახებ ცნობილი იყო. ისინი საეჭვო პირების თვალთვალს და მოსმენას ახორციელებდნენ.

აფეთქებული ბომბისგან განსხვავებით, მეორე ბომბი, რომელიც მეტროს სხვა სადგურში იპოვეს, 700 გრამით მეტ ასაფეთქებელ ნივთიერებას - ტროტილს შეიცავდა.