Euronews: ალბანეთის ხელისუფლებამ ახალი რეგულაციები მიიღო, რომლის მიხედვითაც, იმ დემონსტრანტებს, რომლებიც ძალადობრივ აქციებში მონაწილეობენ, 5,5 ათას დოლარამდე ოდენობის ჯარიმა დაეკისრებათ

ალბანეთის ხელისუფლებამ საპროტესტო აქციებზე ძალადობისა და ძარცვის შემთხვევებთან დაკავშირებული ახალი სანქციები შემოიღო. წესების თანახმად, ჯარიმამ 5 500 ევროს შეიძლება მიაღწიოს და დაეკისროს არა მხოლოდ ძალადობაში უშუალოდ მონაწილე პირებს, არამედ მათაც, ვინც ძალადობრივ ქმედებებში ჩართულ შეკრებაზე დარჩენას გადაწყვეტს, იუწყება Euronews-ი.

ახალი ზომები მთავრობამ მიიღო მაშინ, როდესაც დედაქალაქ ტირანაში პრემიერ-მინისტრ ედი რამას გადადგომის მოთხოვნით საპროტესტო აქციები გრძელდება.

ჯარიმის მაქსიმალური ოდენობა 500 000 ალბანურ ლეკს, დაახლოებით 5 500 ევროს, შეადგენს. სანქციები შეეხება საჯარო სივრცეში შეკრებილ პირებს, რომლებიც ძალადობრივ ქმედებებსა თუ ძარცვაში მონაწილე ჯგუფში რჩებიან, ასევე მათ, ვინც საკუთარ ვინაობას მალავს.

შედარებისთვის, ალბანეთში საშუალო თვიური ხელფასი დღგ-ის ჩათვლით დაახლოებით 930 ევროა.

ახალი წესები პოლიციას უფლებას აძლევს, ძალადობის საფრთხის არსებობის შემთხვევაში, დროებით შეზღუდოს შეკრებები გარკვეულ ადგილებში, მათ შორის სკოლების, სამედიცინო დაწესებულებებისა და სამთავრობო შენობების მიმდებარედ.

კანონმდებლობა ასევე ითვალისწინებს სანქციებს ინტერნეტში ძალადობისკენ მოწოდებისთვის და კომპენსაციის მექანიზმს საპროტესტო აქციების დროს დაზიანებული მცირე ბიზნესებისთვის.

ალბანეთში მთავრობის საწინააღმდეგო საპროტესტო გამოსვლები რამდენიმე თვეა მიმდინარეობს. ბოლო დღეებში ტირანაში დემონსტრანტებსა და უსაფრთხოების ძალებს შორის დაპირისპირება გამწვავდა.

ლიდერის გარეშე მოქმედი საპროტესტო მოძრაობა მაისში მშვიდობიანი დემონსტრაციებით დაიწყო. თავდაპირველად მოქალაქეები ბუნებრივ ნაკრძალში ძვირად ღირებული სასტუმროს მშენებლობას აპროტესტებდნენ. პროექტი აშშ-ის პრეზიდენტ დონალდ ტრამპის ოჯახთან არის დაკავშირებული.

ოქტომბრის შუა რიცხვებისთვის პროტესტის მოთხოვნები გაფართოვდა და მოიცვა კორუფციის სავარაუდო შემთხვევები და ჯანდაცვის სისტემის პრობლემები.

ოფიციალური შეფასებით, ოქტომბრის შუა რიცხვებიდან გამართულმა აქციებმა 2 მილიონ ევროზე მეტი ზარალი გამოიწვია. დემონსტრანტებსა და პოლიციას შორის შეტაკებებისას 350-ზე მეტი ადამიანი დაშავდა. პოლიციამ ხალხის დასაშლელად ცრემლსადენი გაზი და წყლის ჭავლი გამოიყენა.