The Wall Street Journal: ჯეი დი ვენსი ირანთან სამშვიდობო მოლაპარაკებების განახლებას ცდილობს

აშშ-ის ვიცე-პრეზიდენტი ჯეი დი ვენსი ირანის ერთ-ერთ ყველაზე გავლენიან, მკაცრი პოზიციის მქონე პოლიტიკოსთან კონტაქტზე გავიდა, რათა სამშვიდობო მოლაპარაკებების განახლების შესაძლებლობა შეისწავლოს. ინფორმაციას The Wall Street Journal-ი აშშ-ის ოფიციალურ პირებსა და საკითხთან დაახლოებულ წყაროებზე დაყრდნობით ავრცელებს.

გამოცემის ცნობით, ეს მცდელობა მიმდინარეობს იმ ფონზე, როდესაც პრეზიდენტი დონალდ ტრამპი მომდევნო კვირის შუალედური არჩევნების შემდეგ ირანის წინააღმდეგ ომის განახლებით იმუქრება.

გამოცემის წყაროების თანახმად, ვენსმა წერილი გაუგზავნა მოჰსენ რეზაის - ირანის უმაღლესი ეროვნული უსაფრთხოების საბჭოს მდივანს, რომელიც წარსულში ისლამური რევოლუციის გუშაგთა კორპუსს ყველაზე ხანგრძლივი პერიოდის განმავლობაში ხელმძღვანელობდა.

ერთ-ერთი წყაროს ინფორმაციით, წერილი ვენსმა ტრამპის მითითებით გაგზავნა, ხოლო აშშ-ის პრეზიდენტმა ვიცე-პრეზიდენტის ამ ნაბიჯის შესახებ იცის. ვენსი ცდილობს გაარკვიოს, შესაძლებელია თუ არა ვაშინგტონსა და თეირანს შორის ისეთი საერთო პოზიციის მოძებნა, რომელიც ტრამპს ირანის წინააღმდეგ უახლოეს კვირებში ხანმოკლე, მაგრამ ინტენსიური სამხედრო დარტყმების განხორციელების საბოლოო ბრძანების გაცემისგან შეაკავებდა.

აშშ-ის ზოგიერთი ოფიციალური პირის აზრით, ირანის მკაცრი ხაზის მომხრე პოლიტიკოსებთან მოლაპარაკებამ შესაძლოა უკეთესი დიპლომატიური შედეგი გამოიღოს. გამოცემის ცნობით, ომის დასაწყისში აშშ-ისა და ისრაელის მიერ ირანის რეჟიმის ხელმძღვანელების ლიკვიდაციის შემდეგ თეირანში ამ ჯგუფის გავლენა გაიზარდა.

გასულ კვირას ტრამპმა განაცხადა, რომ მისი ადმინისტრაცია ირანთან მოლაპარაკებებს არ აწარმოებდა და მიანიშნა, რომ სამხედრო დარტყმები შესაძლოა მალე განხორციელებულიყო.

„მათთან მოლაპარაკებებს არ ვაწარმოებთ. ასე თუ ისე, რაღაც მოხდება და ეს მალე მოხდება“, - განაცხადა აშშ-ის პრეზიდენტმა.

The Wall Street Journal-ის წყაროს ცნობით, ვენსის წერილში და შემდგომ კონტაქტებში სამშვიდობო შეთანხმების კონკრეტული პირობები განხილული არ ყოფილა. საუბარი ძირითადად მოლაპარაკებების შესაძლო ჩარჩოს განსაზღვრას შეეხებოდა. რეზაიმ გასულ კვირას განაცხადა, რომ თეირანი ვაშინგტონთან მოლაპარაკებებს მანამდე არ დაიწყებდა, ვიდრე ირანის ძირითადი მოთხოვნები არ დაკმაყოფილდებოდა.

ვენსი საჯაროდ მხარს უჭერდა ირანის წინააღმდეგ ომს, თუმცა პირად საუბრებში კონფლიქტის გახანგრძლივებასთან დაკავშირებით შეშფოთებას გამოხატავდა. გამოცემის ცნობით, ჯერ კიდევ თებერვალში, სანამ ტრამპი სამხედრო ოპერაცია „ეპიკურ მრისხანებას“ დაიწყებდა, ვიცე-პრეზიდენტი უფრო აქტიური დიპლომატიის მომხრე იყო.

მოგვიანებით ტრამპმა ვენსს მოლაპარაკებების ხელმძღვანელობა დააკისრა. ვიცე-პრეზიდენტი ირანელ წარმომადგენლებთან შესახვედრად ორჯერ გაემგზავრა საზღვარგარეთ, რათა კონფლიქტის დასრულების შესახებ საბოლოო შეთანხმებისთვის მიეღწია.

ივნისში მიღწეული ურთიერთგაგების მემორანდუმი ხელმოწერიდან ორი კვირის შემდეგ ჩაიშალა. მხარეები ჰორმუზის სრუტეში საზღვაო მიმოსვლის აღდგენის მექანიზმების განსხვავებულ ინტერპრეტაციებს ვერ შეთანხმდნენ.