ზელენსკი: რუსეთი მთელი ღამისა და დილის განმავლობაში უკრაინის რეგიონებს უტევდა

უკრაინის პრეზიდენტ ვოლოდიმირ ზელენსკის განცხადებით, რუსეთი მთელი ღამისა და დილის განმავლობაში უკრაინის რეგიონებს თავს ესხმოდა.

როგორც ზელენსკიმ „ტელეგრამის“ საკუთარ არხზე დაწერა, ხარკოვში რუსეთის ძალებმა მრავალსართულიან საცხოვრებელ კორპუსზე ძლიერი დარტყმა მიიტანეს, რის შედეგადაც შენობის მეორე და მეოთხე სართულები ნაწილობრივ განადგურდა.

მისი განცხადებით, დრონებით თავდასხმების შედეგად დაზიანდა ობიექტები კიევშიც, მათ შორის საცხოვრებელი სახლები, საკომუნიკაციო ინფრასტრუქტურა და ბენზინგასამართი სადგურები. განადგურდა კაფე, თავდამსხმელები ცდილობდნენ, ცეცხლი წაეკიდებინათ დედაქალაქის სასურსათო ბაზრისთვის.

„ოდესის ოლქში პალაუს დროშით მცურავ გემს დაარტყეს. ჟიტომირის ოლქში დაზიანდა ნაყინის ქარხანა. საცხოვრებელ სახლებზე დარტყმები იყო სუმის, რივნეს, ხარკოვისა და ოდესის ოლქებში“, - განაცხადა ზელენსკიმ.

მისივე თქმით, ვინიცის, დნეპროპეტროვსკის, ხმელნიცკისა და ზაპოროჟიეს ოლქებში თავდასხმის სამიზნე კრიტიკულად მნიშვნელოვანი ინფრასტრუქტურა გახდა.

„ყველგან, სადაც საჭიროა, საგანგებო სამსახურები მუშაობენ“, - აღნიშნა ზელენსკიმ.

უკრაინის პრეზიდენტის ინფორმაციით, ამ დროისთვის დაშავებულთა რაოდენობა ათეულობით ადამიანს შეადგენს. მხოლოდ ხარკოვზე დარტყმის შედეგად 28 ადამიანი დაშავდა, მათ შორის ცხრა ბავშვია.

„სამწუხაროდ, არიან დაღუპულებიც. კიევის ოლქში ორი ადამიანი დაიღუპა, მათგან ერთი აზერბაიჯანის მოქალაქე იყო. ვუსამძიმრებ მათ ოჯახებსა და ახლობლებს“, - განაცხადა ზელენსკიმ.

უკრაინის პრეზიდენტმა მადლობა გადაუხადა ყველას, ვინც უკრაინაში მიმდინარე მოვლენებზე დუმილს არ ამჯობინებს და ქვეყნისთვის კონკრეტული დახმარების პაკეტების მომზადებაში მონაწილეობს.

„საჭიროა მკაფიო გადაწყვეტილებები. საჰაერო თავდაცვის საშუალებები, ენერგეტიკული მხარდაჭერა, საბიუჯეტო დეფიციტის დაფარვაში დახმარება. ეს არის ის, რაც დღეს რეალურად აძლიერებს უკრაინას და ჩვენს ხალხს წინააღმდეგობის გაწევაში ეხმარება“, - განაცხადა ზელენსკიმ.