ევროპარლამენტარები აკრიტიკებენ ფონ დერ ლაიენის გადაწყვეტილებას ერთსულოვნების პრინციპის დათმობის შესახებ
მსოფლიო

ფოტო: Shutterstock
ევროპარლამენტარები მწვავედ აკრიტიკებენ ევროკომისიის პრეზიდენტის გადაწყვეტილებას, რომ უსაფრთხოებისა თუ სხვა მნიშვნელოვან საკითხებზე ევროკავშირმა ერთსულოვნების პრინციპი უნდა დათმოს და გადაწყვეტილებები წევრი სახელმწიფოების ხმათა უმრავლესობით მიიღოს. ევროდეპუტატ ჰერმან ტერხეს განცხადებით, ამით ურსულა ფონ დერ ლაიენმა საბოლოო დარტყმა მიაყენა ევროპელი ერების სუვერენიტეტს.
„ეს არის საბოლოო დარტყმა, რომელიც ბრიუსელის კასტამ ევროპის ერთა სუვერენიტეტს მიაყენა. ამიერიდან ვერცერთი ეროვნული მთავრობა ვერ დაიცავს საკუთარი ხალხის ინტერესებს, ამ კასტის, ევროპული ინსტიტუტებისა და იმ ბიუროკრატიული აპარატის წინააღმდეგ, რომელიც მუდმივად გერმანიას ემსახურება“, - წერს ევროპარლამენტარი.
პოლონელი ევროპარლამენტარი ევა ზაიაჩკოვსკა ჰერნიკი კი წერს, რომ ევროკომისიის პრეზიდენტი ცდილობს, ევროკავშირი ბრიუსელიდან მართულ სუპერსახელმწიფოდ გარდაქმნას, სადაც წევრი სახელმწიფოები ეროვნულ ინტერესებს ვეღარ დაიცავენ.
„ეს არის იმ ცნობილი კანონის უზენაესობის ვერსია, რომელსაც ევროკავშირის ფსევდოელიტა აღასრულებს და ევროკავშირს ევროკომუნად გარდაქმნის. წევრი სახელმწიფოებისთვის ვეტოს უფლების ჩამორთმევით სურთ კიდევ უფრო ეფექტიანად დაამყარონ გერმანია-ბრიუსელის დიქტატი. ამგვარად შეძლებენ კორუმპირებული და სრულიად მოუმზადებელი უკრაინის ევროკავშირში მიღებასაც. დღეს ფონ დერ ლაიენი აღარც კი მალავს სურვილს, რომ ეროვნული სუვერენიტეტის უკანასკნელი ნარჩენიც კი წაგვართვას. მე ბოლომდე დავიცავ ერთსულოვნების პრინციპს“, - წერს ჰერნიკი.





