ევროპის სახალხო პარტიის პრეზიდენტი: 2025 წელი ფუნდამენტური ისტორიული ცვლილებების წელია - ყოველივე ამან ბრიუსელს მკაფიო წარმოდგენა შეუქმნა, რომ ჩვენ აღარ ვეყრდნობით ამერიკას, როგორც თავისუფალი სამყაროს ლიდერს
მსოფლიო

მანფრედ ვებერი
ფოტო: GettyImages
გამოცემა POLITOCO-სთან ინტერვიუში ევროპის სახალხო პარტიის პრეზიდენტმა, მანფრედ ვებერმა განაცხადა, რომ მაშინ, როცა ბრიუსელი უფრო მეტად მარტოა, ვიდრე ოდესმე ამ მზარდად საშიშ სამყაროში, მას ჯერ კიდევ არ აქვს გადაწყვეტილი, რა მოიმოქმედოს ამასთან დაკავშირებით.
„როდესაც აშშ-ზე ვსაუბრობთ, უნდა ვაღიაროთ, რომ 2025 წელი ფუნდამენტური ისტორიული ცვლილებების წელია“, - განაცხადა ვებერმა.
მან ხაზი გაუსვა პრეზიდენტ დონალდ ტრამპისა და რუსეთის ლიდერის, ვლადიმირ პუტინის შეხვედრებს, ისევე როგორც ვაშინგტონის ბოლოდროინდელ თავდასხმებს ევროკავშირზე.
„ყოველივე ამან ბრიუსელს მკაფიო წარმოდგენა შეუქმნა იმის შესახებ, რომ ჩვენ აღარ ვეყრდნობით ამერიკას, როგორც თავისუფალი სამყაროს ლიდერს“, - აღნიშნა ევროპის სახალხო პარტიის პრეზიდენტმა.
მისი თქმით, საჭიროა ახალი რეფორმები იმის უზრუნველსაყოფად, რომ მთელი კონტინენტის ხმა სათანადოდ იქნეს გაგონილი.
„ჩვენ გვჭირდება დებატები სამუშაო სტრუქტურის - ევროკავშირის არქიტექტურის - შესახებ. ჩვენ არ ვართ მზად ამ ისტორიული მომენტისთვის“, - განაცხადა ვებერმა.
ვებერის თქმით, შესაძლოა გადახედვას საჭიროებდეს ლისაბონის ხელშეკრულებაც კი, რომელიც ევროკავშირის კონსტიტუციურ საფუძველსა და გადაწყვეტილებების მიღების წესებს განსაზღვრავს.
`ჩვენ გვჭირდება შორსმჭვრეტელი მიდგომა, ძლიერი ევროპა... ამერიკის გარეშე ჩვენ თავად უნდა დავდგეთ ფეხზე“, - ხაზგასმით აღნიშნა მან.




