უკრაინის შეიარაღებულმა ძალებმა ზაპოროჟიეს ოლქში სოფელი ნოვოვასილევსკოე დატოვა

უკრაინის შეიარაღებულმა ძალებმა ზაპოროჟიეს ოლქში განლაგებულ სოფელ ნოვოვასილევსკოედან უკან დაიხიეს. ინფორმაციას შეიარაღებული ძალების გენერალური შტაბი ავრცელებს.

„საბრძოლო შენაერთების გადაჯგუფების, ბრძოლის ველის კონფიგურაციის ცვლილებისა და აგრეთვე სამხედრო მოსამსახურეების სიცოცხლის შენარჩუნების მიზნით, ჩვენი ქვედანაყოფები ნოვოვასილევსკოეს დასახლებული პუნქტიდან გავიდნენ და უფრო ხელსაყრელ თავდაცვით პოზიციებზე განლაგდნენ“, - აღნიშნულია გენშტაბის მიერ გავრცელებულ ინფორმაციაში.

უკრაინის არმიის ინფორმაციით, მტრის წინსვლის ბლოკირება და მისთვის კომბინირებული საცეცხლე დარტყმის მიყენება გრძელდება, გააფთრებული ბრძოლები უკრაინული მიწის თითოეული მეტრისთვის მიმდინარეობს.