თურქეთის საგარეო უწყებამ აია-სოფიას ტაძრის საკითხზე მაიკ პომპეოს განცხადება გააკრიტიკა

თურქეთის საგარეო საქმეთა სამინისტრომ აია-სოფიას ტაძართან დაკავშირებით აშშ-ის სახელმწიფო მდივნის, მაიკ პომპეოს მიერ გაკეთებული განცხადება გააკრიტიკა. ინფორმაციას ამის შესახებ ადგილობრივი მედია ავრცელებს.

„გაკვირვებულები ვართ სახელმწიფო დეპარტამენტის განცხადებით. თურქეთი იცავს ყველა კულტურის ძეგლს, მათ შორის აია-სოფიას, ყოველგვარი დისკრიმინაციის გარეშე. აია-სოფია თურქეთის ტერიტორიაზე მდებარეობს და თურქეთის საკუთრებაა. ნებისმიერი საკითხი, რომელიც აია-სოფიას ეხება, თურქეთის შიდა საქმეს წარმოადგენს“, - განაცხადა საგარეო უწყების ოფიციალურმა წარმომადგენელმა ხამი აქსოიმ.

მიმდინარე წლის მარტში თურქეთის პრეზიდენტმა რეჯეფ თაიფ ერდოღანმა მედიასთან ინტერვიუში განაცხადა, რომ აია-სოფიამ შესაძლოა მუზეუმის სტატუსი დაკარგოს და მეჩეთად გადაკეთდეს. აშშ-ის სახელმწიფო მდივანმა, მაიკ პომპეომ თურქეთს მოუწოდა, ტაძარი მეჩეთად არ გადაკეთდეს.

წმინდა სოფიას ტაძარი კონსტანტინოპოლში ათას წელზე დიდხანს ყველაზე დიდ ტაძრად ითვლებოდა ქრისტიანულ სამყაროში. ბიზანტიის იმპერიის დაცემის შემდეგ ის მეჩეთად გადაკეთდა, თუმცა 1934 წელს მუსტაფა ქემალ ათათურქის შესაბამისი დეკრეტის საფუძველზე ის მუზეუმი გახდა და იუნესკოს დაცულ ძეგლთა სიაში მოხვდა.