სპორტის მინისტრმა ახალგაზრდა ძალოსნებს ევროპის ჩემპიონატზე მიღწეული წარმატება მიულოცა

საქართველოს სპორტის მინისტრმა შალვა გოგოლაძემ ახალგაზრდა ძალოსნებს ევროპის ჩემპიონატზე მიღწეული წარმატება მიულოცა და მომავალ ასპარეზობებშიც წარმატება უსურვა.

ალბანეთში 20- და 23-წლამდელებს შორის ძალოსანთა ევროპის ჩემპიონატი გაიმართა, რომელზეც ქართველმა სპორტსმენებმა 30 მედალი მოიპოვეს, აქედან - 12 ოქრო, 11 ვერცხლი და შვიდი ბრინჯაო.

20-წლამდელებმა გუნდური მედლებით პირველი ადგილი დაიკავეს, გუნდური ქულებით კი მეორე. 23-წლამდელები კი გუნდური ქულებით მესამე ადგილზე გავიდნენ.

ჩემპიონატზე ლევან ოჩიგავამ (88 კგ) სამი ოქროს მედალი დაისაკუთრა, ასევე სამი ოქროს მედალი მოიპოვა გოგა ჯაჯვანმაც (94 კგ); ნათია გადელიამ +(86 კგ) ერთი ბრინჯაოსა და ორი ოქროს მედალი; საბა ასანიძემ (94 კგ) ორი ბრინჯაოს მედალი; მანუჩარ გოგოხიამ (88 კგ) ერთი ოქროს, ერთი ვერცხლისა და ერთი ბრინჯაოს მედალი; გიგა ოდიკაძემ (60 კგ) კი ოქროს, ვერცხლისა და ბრინჯაოს მედლები დაისაკუთრა; ზურაბ მსხალაძემ (88 კგ) ორი ოქროსა და ერთი ვერცხლის მედალი მოიპოვა; ნანა ხორავამ (77 კგ) ორი ვერცხლის მედალი დაისაკუთრა; ირაკლი ვეკუამ (+110 კგ) ერთი ბრინჯაოს მედალი მოიპოვა; ვერცხლის მედლით დაასრულა ევროპის ჩემპიონატი გერვასი თაბაგარმა (94 კგ); მარიამ მურღვლიანმა (+86 კგ) კი სამი ვერცხლის მედალი მოიპოვა; გურამ ვეკუამ (+110 კგ) ატაცსა და აკვრაში ვერცხლის მედლები მოიპოვა, ორჭიდის ჯამში კი ბრინჯაოს პრიზიორი გახდა.

შეხვედრას ასევე ესწრებოდნენ სპორტის მინისტრის პირველი მოადგილე ირაკლი მეძმარიაშვილი, მინისტრის მოადგილე ირაკლი დოლაბერიძე, საქართველოს ძალოსნობის ეროვნული ფედერაციის პრეზიდენტი ლაშა ტალახაძე და ფედერაციის სხვა წარმომადგენლები.

ქართველი ძალოსნები ევროპის ჩემპიონატზე სპორტის სამინისტროს მხარდაჭერით იმყოფებოდნენ.

ინფორმაციას სპორტის სამინისტრო ავრცელებს.