L’Equipe: 17 მარტს უეფა 2020 წლის ევროპის საფეხბურთო ჩემპიონატის გაისად ჩატარების შესახებ გამოაცხადებს

მომდევნო კვირას უეფა 2020 წლის ევროპის საფეხბურთო ჩემპიონატის გაისად ჩატარების შესახებ გამოაცხადებს.

ამის შესახებ ინფორმაციას ფრანგული სპორტული გამოცემა L’Equipe საკუთარ წყაროზე დაყრდნობით ავრცელებს.

გამოცემის ინფორმაციით, ამგვარ განცხადებას უეფა 17 მარტს საგანგებო სხდომაზე გააკეთებს. აღსანიშნავია, რომ 17 მარტს უეფა ვიდეოკონფერენციის ფორმატში ორგანიზაციაში შემავალი ეროვნული ფედერაციების ხელმძღვანელებთან სხდომას გამართავს. სხდომის ფარგლებში სხვა საკითხებთან ერთად ევრო 2020-ის საკითხსაც განიხილავენ.

აქამდე უეფაში აცხადებდნენ, რომ კორონავირუსის ინფექციის გავრცელების მიუხედავად ევროპის ჩემპიონატი არ გაუქმდებოდა.

2020 წლის ევროპის საფეხბურთო ჩემპიონატი 12 ივნისიდან 12 ივლისის პერიოდში ევროპის 12 ქალაქში უნდა გაიმართოს.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.

რა უნდა ვიცოდეთ პანდემიის შესახებ, წაიკითხეთ აქ.