„ბიოლის“ დამფუძნებელი: წავკისის, კოჯრისა და მიმდებარე ტერიტორიების პატრულირებისთვის გამოიყო ორი საპატრულო მანქანა, რომლებიც ამ ტერიტორიებზე მუდმივად იმუშავებენ. შოკში ვარ! სახელმწიფო უწყებების მხრიდან ასეთ რეაგირებას ცხოვრებაში პირველად ვხედავ

გულწრფელად გეტყვით, შოკში ვარ! სახელმწიფო უწყებების მხრიდან ასეთ რეაგირებას ცხოვრებაში პირველად ვხედავ, - წერს სამედიცინო ველნეს კურორტ „ბიოლის“ დამფუძნებელი თამაზ მჭედლიძე სოციალურ ქსელში.

„სასწაული ამბავი მინდა გაგიზიაროთ! დღეს ჩემთან გარემოს დაცვის უწყების წარმომადგენელი მოვიდა და მაცნობა: წავკისის, კოჯრისა და მიმდებარე ტერიტორიების პატრულირებისთვის გამოიყო ორი საპატრულო მანქანა, რომლებიც ამ ტერიტორიებზე მუდმივად იმუშავებენ.

პატრულები დაიცავენ წესრიგს, აღკვეთენ უკანონო ნადირობას და ნაგვისა თუ ფოთლების დაწვას.

ალბათ ყველამ არ იცის, რომ ნაგვისა და თუნდაც ჩვეულებრივი ჩამოცვენილი ფოთლების წვისას გამოიყოფა მავნე, მათ შორის კანცეროგენური ნივთიერებები. ეს კვამლი აბინძურებს ჰაერს, რომელსაც ყველა ვსუნთქავთ, ზიანს აყენებს ადამიანების ჯანმრთელობასა და გარემოს.

გულწრფელად გეტყვით, შოკში ვარ! სახელმწიფო უწყებების მხრიდან ასეთ რეაგირებას ცხოვრებაში პირველად ვხედავ“, - წერს მჭედლიძე.

რამდენიმე საათის წინ მჭედლიძე წერდა, რომ მათ ტერიტორიაზე მუდმივად ისმის სროლის ხმები, რის გამოც დამსვენებლები რიგ შემთხვევაში კურორტს დროზე ადრე ტოვებენ. ის აღნიშნავდა, რომ შესაბამისი სახელმწიფო უწყების ცხელ ხაზზე კურორტის ადმინისტრაციას პასუხობენ, რომ ამ დროისთვის ნადირობის სეზონი გახსნილია.