მუნიციპალური განვითარების ფონდის წარმომადგენლები Canton Fair-ზე სამშენებლო ინოვაციებს და ტექნოლოგიებს გაეცნენ

რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდის აღმასრულებელი დირექტორის მოადგილეები ქვარა ჩართოლანი და ქეთევან შუბითიძე ჩინეთის ქალაქ გუანჯოუში ჩინეთის იმპორტისა და ექსპორტის 140-ე საერთაშორისო გამოფენის — Canton Fair-ის მეორე ფაზას დაესწრნენ.

Canton Fair ერთ-ერთი უმსხვილესი საერთაშორისო სავაჭრო გამოფენაა, რომელშიც მსოფლიოს სხვადასხვა ქვეყნის კომპანიები და წარმომადგენლები მონაწილეობენ. გამოფენის მეორე ფაზაზე წარმოდგენილია თანამედროვე სამშენებლო და მოსაპირკეთებელი მასალები, სანტექნიკა, ავეჯი, ენერგოეფექტური საინჟინრო გადაწყვეტები, კერამიკული ნაწარმი და გარე სივრცეების მოწყობისა და გამწვანებისთვის საჭირო ინვენტარი.

ვიზიტის ფარგლებში დელეგაციის წევრები დეტალურად გაეცნენ სექტორის ინოვაციებსა და წარმოების უახლეს ტექნოლოგიებს. ასევე გაიმართა B2B ფორმატის შეხვედრები წამყვან საერთაშორისო მწარმოებლებთან.

ფონდი ქვეყნის მასშტაბით ახორციელებს და გეგმავს მასშტაბურ ინფრასტრუქტურულ პროექტებს, საგანმანათლებლო, სპორტული და ურბანული მიმართულებით. ვიზიტის ფარგლებში მიღებული გამოცდილება და გაზიარებული ინოვაციური მიდგომები ხელს შეუწყობს პროექტების საერთაშორისო სტანდარტების შესაბამისად, თანამედროვე ტექნოლოგიების გამოყენებითა და მაღალი ხარისხით განხორციელებას.