ნიკოლოზ ჩხეტიანი: ქუთაისის საერთაშორისო უნივერსიტეტი არის სახელმწიფო უნივერსიტეტი, მაგრამ 100%-ით დაფინანსებული ბიძინა ივანიშვილის ოჯახისა და ფონდი „ქართუს” მიერ. ეს არის უნიკალური მდგომარეობა, სადაც ქველმოქმედმა, მეცენატმა დააფუძნა არა კერძო უნივერსიტეტი, არამედ დააფუძნა და აფინანსებს სახელმწიფო სასწავლებელს

ქუთაისის საერთაშორისო უნივერსიტეტი ფონდი „ქართუს“ უმნიშვნელოვანესი პროექტია - ბიძინა ივანიშვილის ოჯახისა და ფონდის საქველმოქმედო პროექტების, მათ შორის ქუთაისის საერთაშორისო უნივერსიტეტის შესახებ გადაცემაში „იმედის კვირა“ ფონდი „ქართუს“ გამგეობის თავმჯდომარემ ნიკოლოზ ჩხეტიანმა ისაუბრა.

„ქუთაისის საერთაშორისო უნივერსიტეტი არის სახელმწიფო უნივერსიტეტი, მაგრამ 100%ით დაფინანსებული ბიძინა ივანიშვილის ოჯახისა და ფონდი „ქართუს” მიერ. შესაბამისად ეს არის უნიკალური მდგომარეობა, სადაც ქველმოქმედმა, მეცენატმა არა კერძო უნივერსიტეტი დააფუძნა - ეგეთი მაგალითები უამრავია, არამედ დააფუძნა და აფინანსებს სახელმწიფო სასწავლებელს, რაც ვფიქრობ ძალიან კარგად ეხმაურება იმ განათლების რეფორმას, რაც დღეს ხორციელდება ქვეყანაში და ძალიან კარგად ჯდება ამ ერთიან კონცეფციაში“, - აღნიშნა ნიკოლოზ ჩხეტიანმა.

ქუთაისის საერთაშორისო უნივერსიტეტი ახალი ტიპის პირველი კამპუსური უნივერსიტეტია, რომელსაც რეგიონში ანალოგი არ აქვს - სივრცე, რომელიც განათლებას, ტექნოლოგიებს, სამეცნიერო კვლევებსა და ინოვაციას აერთიანებს.