თამარ იაკობიძე: გიორგი გახარიამ გადაამეტა სამსახურეობრივ უფლებამოსილებას. მის მიერ მიღებულმა გადაწყვეტილებამ კი, საზოგადოების და სახელმწიფოს კანონიერი ინტერესების არსებითი დარღვევა გამოიწვია

გიორგი გახარიამ გადაამეტა სამსახურეობრივ უფლებამოსილებას. მის მიერ მიღებულმა გადაწყვეტილებამ კი, საზოგადოების და სახელმწიფოს კანონიერი ინტერესების არსებითი დარღვევა გამოიწვია, - განუცხადა „იმედის კვირას“ პროკურორმა თამარ იაკობიძემ სოფელ ჩორჩანაში საგუშაგოს აღმართვის საქმეზე საუბრისას.

პროკურორის თქმით, სოფელ ჩორჩანაში საპოლიციო საგუშაგოს აღმართვიდან მალევე, ცხინვალის დე ფაქტო რეჟიმის უკანონო შეიარაღებულმა ფორმირებებმა დაიკავეს სიმაღლეები ცენტრალური ხელისუფლების მიერ კონტროლირებად ტერიტორიაზე.

„მათი კონტროლის ქვეშ აღმოჩნდა დაახლოებით 100 ჰექტარი ტყის მასივი, ასევე ხაშურის მუნიციპალიტეტის სოფლების წნელისას და ყობის მცხოვრებლების სახლები, და ადგილი ჰქონდა 2008 წლის აგვისტოს ომის შემდეგ უკანონო აქტივობების უპრეცედენტო მასშტაბს, შეიარაღებული სამხედრო ტექნიკის გადაადგილებას დასახლებული პუნქტების მიმართულებით, რამაც მხარეებს შორის სამხედრო ესკალაციის საფრთხე შექმნა.

იმ პირობებში, როდესაც გიორგი გახარიამ სახელწმიფო უსაფრთხოების სამსახურთან და მთავრობის მეთაურთან შეუთანხმებლად, ასევე ეროვნული უშიშროების საბჭოს, რომლის მდივანიც იყო, იგნორირებითა და ევროკავშირის სადამკვირვებლო მისიის ინფორმირების გარეშე განახორციელა საგუშაგოს აღმართვა, აღნიშნულით მან გადაამეტა სამსახურეობრივ უფლებამოსილებას. მის მიერ მიღებულმა გადაწყვეტილებამ კი, საზოგადოების და სახელმწიფოს კანონიერი ინტერესების არსებითი დარღვევა გამოიწვია", - განაცხადა პროკურორმა.