ნუცუბიძეზე გარდაცვლილი კაცის საქმეში პოლიციის შესაძლო გადაცდომას ომბუდსმენი სწავლობს

ნუცუბიძის პლატოზე 33 წლის პაატა პავლიაშვილის გარდაცვალების საქმეში პოლიციის შესაძლო გადაცდომას სახალხო დამცველის აპარატი სწავლობს. ამის შესახებ ინფორმაციას გამოცემა "ნეტგაზეთი" ავრცელებს.

ნუცუბიძის ფერდობზე მომხდარი ინციდენტის შესახებ შსს-მ ვიდეომასალა გაავრცელა, რომელშიც მომხდარის თვითმხილველები კონფლიქტის დეტალებს იხსენებენ.

ვიდეოში ორი თვითმხილველი ადასტურებს, რომ პაატა პავლიაშვილი, რომელიც ინციდენტის დროს გარდაიცვალა, ნასვამი იყო და პატრულს აგრესიულად ექცეოდა.

უწყების მტკიცებით, 33 წლის კაცი ნასვამი იყო და მის აგრესიულობაზე საპასუხოდ, ადმინისტრაციული წესით დაკავებისას, ის მოულოდნელად ცუდად გახდა და გარდაიცვალა.

თუმცა, არსებობენ სხვა მოწმეებიც, რომლებიც აცხადებენ, რომ როცა ახალგაზრდა ცუდად გახდა, მას სამართალდამცველებმა არ დაუჯერეს და დახმარების ნაცვლად, მის დაკავებას ისევ განაგრძობდნენ.