თორნიკე რიჟვაძე: აჭარის 39 სოფელსა და დაბაში თანამედროვე სტანდარტების მქონე წყალმომარაგებისა და წყალარინების პროექტის სამუშაოები დაიწყება, რის შედეგადაც 24-საათიანი წყალმომარაგებით 6 ათასზე მეტი ოჯახი ისარგებლებს

აჭარის 39 სოფელსა და დაბაში თანამედროვე სტანდარტების მქონე წყალმომარაგებისა და წყალარინების პროექტის სამუშაოები იწყება, - ამის შესახებ აჭარის მთავრობის თავმჯდომარე თორნიკე რიჟვაძემ პროექტის პრეზენტაციაზე განაცხადა.

„ეს არის მართლაც ისტორიული პროექტი და ამ პროექტის განხორციელების შედეგად აჭარაში 6 ათასზე მეტი ოჯახი თანამედროვე, უწყვეტი, უსაფრთხო, 24-საათიანი წყალმომარაგებით ისარგებლებს. პროექტის ღიებულება დაახლოებით, 100 მლნ ევროს შეადგენს და ხორციელდება ჩვენი ევროპელი პარტნიორების მხარდაჭერით ხორციელდება. მინდა, მადლობა გადავუხადო გერმანიის ფედერაციულ რესპუბლიკის მთავრობას, გერმანიის განვითარების ბანკს, ევროპელ დონორებს და დარწმუნებული ვარ, რომ მათთან ერთად ეს პროექტი დროულად და შესაბამისი ბიუჯეტით იქნება განხორციელებული.

გეგმის მიხედვით, პროექტი ყველა მუნიციპალიტეტში ერთდროულად დაიწყება და უკვე წლის ბოლოსთვის 6 სოფელი ისარგებლებს თანამედროვე წყალმომარაგების უწყვეტი სისტემებით, ხოლო პროექტი სრულად 2 წელიწადში დასრულდება. შესაბამისად, ათასობით ოჯახი მართლაც გაიხარებს ამ პროექტის განხორციელებით“, - განაცხადა რიჟვაძემ.

მისივე თქმით, ეს პროექტი ეკონომიკური განვითარების კიდევ უფრო მეტ წინაპირობას შექმნის, კერძოდ, სოფლად ტურიზმის განვითარებას შეუზწობს ხელს და თანამოქალაქეების ყოველდღიურ ყოფას გააუმჯობესებს.