პატრიარქი ღვთისმსახურებს არაკორექტული და პოლიტიკური შინაარსის განცხადებების გამო აკრიტიკებს

საქართველოს პატრიარქი ილია მეორე, საზოგადოებაში არსებულ მითქმა-მოთქმასთან დაკავშირებით - უნდა ერეოდეს თუ არა ეკლესია სახელმწიფოს საქმეებში - სპეციალურ მიმართვას აქვეყნებს.

„სამწუხაროდ, არჩევნების მოახლოებასთან დაკავშირებით, ზოგიერთი ღვთისმსახური აკეთებს პოლიტიკური შინაარსის განცხადებებს და, ამასთან, საჯარო სივრცეში არაკორექტულად მოიხსენიებს ამა თუ იმ პოლიტიკურ პირს.

მოვუწოდებთ მოძღვრებს, მღვდელმთავრებს თავი შეიკავონ მსგავსი ქმედებისგან. მათ ასევე შევახსენებთ, რომ ეკლესია ყოველვის იყო და იქნება პოლიტიკურად ნეიტრალური ერის გამაერთიანებელი ძალა და ჩრდილს ნუ აყენებენ მას და საკუთარ თავს“, - ნათქვამია პატრიარქის მიმართვაში.

ბოლო დღეების განმავლობაში მეუფეებმა პეტრემ და იაკობმა პრეზიდენტობის კანდიდატის, სალომე ზურაბიშვილის მისამართით არაკორექტული განცხადებები გააკეთეს.

სალომე ზურაბიშვილის განცხადებაზე, რომ კანაფის პოლიტიკასთან დაკავშირებით საზოგადოება ინფორმირებული არაა, საჭიროა საინფორმაციო კამპანია, რომელსაც ის გაუძღვება, ბოდბელმა ეპისკოპოსმა იაკობმა არ მოიწონა და პრეზიდენტობის კანდიდატს „კანაფის დედოფალი“ უწოდა. რაც შეეხება ჭყონდიდის მიტროპოლიტ მეუფე პეტრეს, მან სალომე ზურაბიშვილი ტაძარში ქადაგებისას გააკრიტიკა და აღნიშნა, რომ ის ვერ მოუტანს ქვეყანას კეთილდღეობას. „ჩვენი დაფრანგული ქალბატონი თავის დაფრანგული აზროვნებით ვერ მოგვიტანს კეთილდღეობას“ - განაცხადა ღვთისმსახურმა.

ჭყონდიდის მიტროპოლიტის განცხადება დისკრიმინაციულად შეაფასა არასამთავრობო ორგანიზაციამ „არა ფობიას“.

18 სექტემბერს ტელეკომპანია „იმედის“ გადაცემაში „პირისპირ“, პრეზიდენტობის კანდიდატმა სალომე ზურაბიშვილმა განაცხადა, რომ არ არის სწორი სასულიერო პირების აქტური ჩართულობა პოლიტიკურ საარჩევნო კამპანიაში, მათი მხრიდან კანდიდატების შეფასება საჯაროდ და რომ ეს სახელმწიფოს და ეკლესიას შორის გაფორმებულ ხელშეკრულებას ეწინააღმდეგება.