აბიტურიენტებს საგანმანათლებლო პროგრამების ჩამონათვალში ცვლილებების შესატანად დრო დაემატათ

შეფასებისა და გამოცდების ეროვნული ცენტრი ეროვნულ გამოცდებში მონაწილე აბიტურიენტებს მიმართავს.

ცენტრში აცახდებენ, რომ აბიტურიენტებს საგანმანათლებლო პროგრამებში ცვლილების განხორციელება, კერძოდ, ფაკულტეტისა და უნივერსიტეტის დამატება ან წაშლა აპელაციის შედეგების გამოქვეყნების შემდეგ კიდევ ერთი დღის განმავლობაში შეეძლებათ.

აბიტურიენტმა სასწავლებლისა და ფაკულტეტის არჩევაში ცვლილება რომ განახორციელოს, ამისთვის, ის თავისი ელექტრონული ფოსტის მისამართისა და პაროლის მითითებით, უნდა შევიდეს საკუთარ გვერდზე და შეიტანოს სასურველი ცვლილებები. აბიტურიენტი ყველა ცვლილების დადასტურებას მიიღებს ელექტრონული ფოსტის საშუალებით. თუ აბიტურიენტი ელექტრონული ფოსტით ვერ მიიღებს აღნიშნულ დადასტურებას (ვერც „inbox“-ში და ვერც „junk“-ის ან „spam“-ის განყოფილებაში), მას სავარაუდოდ, არ აქვს დასრულებული ცვლილებების განხორციელების პროცედურა (მაგალითად, არ დააჭირა თითი შენახვის ღილაკს).

ამასთან, შეფასებისა და გამოცდების ცენტრი აბიტურიენტებისთვის განმარტავს, რისი შეცვლა შეუძლიათ გამოცდების წინასწარი შეფასების გაგებიდან გასაჩივრებამდე.

ცენტრის ინფორმაციით, წინასწარი შედეგები მიმდინარე კვირაში გამოქვეყნდება.

ერთიანი ეროვნული გამოცდები 2 ივლისს დაიწყო და 26 ივლისს, ფიზიკის გამოცდით დასრულდა. საქართველოში სულ 22 საგამოცდო ცენტრი ფუნქციონირებდა.