თორნიკე ფაღავა: ALDE არის პოლიტიკური გაერთიანება, რომელმაც ტერორისტული აქტის ჩამდენ ალეკო ელისაშვილს მხარდაჭერა გამოუცხადა. აქედან გამომდინარე, ძალიან ნათლად იკვეთება მათი პოლიტიკური ინტერესი ქართული სახელმწიფოს წინააღმდეგ

ევროპასთან ინტეგრაციის საპარლამენტო კომიტეტის თავმჯდომარის მოადგილემ, თორნიკე ფაღავამ საქართველოს შესახებ ALDE-ს რეზოლუცია შეაფასა. მან დოკუმენტს ღიმილისმომგვრელი უწოდა და აღნიშნა, რომ ამ პოლიტიკური გაერთიანების ინტერესი საქართველოს წინააღმდეგ ნათლად იკვეთება.

„ALDE არის პოლიტიკური გაერთიანება, რომელმაც ტერორისტული აქტის ჩამდენ ალეკო ელისაშვილს მხარდაჭერა გამოუცხადა. აქედან გამომდინარე, ძალიან ნათლად იკვეთება მათი პოლიტიკური ინტერესი ქართული სახელმწიფოს წინააღმდეგ, მაგრამ ქართულმა საზოგადოებამ ეს ფურცელი უკვე გადაშალა და ძალიან მარტივად და ნათლად ხედავენ მათ პოლიტიკურ ზრახვებს. აქედან გამომდინარე, საბოლოო ჯამში, ღიმილისმომგვრელია მსგავსი ტიპის რეზოლუციები“, - აცხადებს ფაღავა.

საქართველო უშინაარსო და საფუძველს მოკლებული რეზოლუციებით აღარ იმართება - ასეთია „ქართული ოცნების“ პასუხი ALDE-ს მორიგ რეზოლუციაზე, რომლითაც სასამართლო პროცესებზე დაკვირვებას ითხოვს, ასევე მოუწოდებს ევროკავშირსა და სხვა სახელმწიფოებს, საქართველოსთან ურთიერთობისთვის ჰქონდეთ წინაპირობა, ციხიდან მსჯავრდებულების გათავისუფლება.