საქართველოს ვიცე-პრემიერი, საგარეო საქმეთა მინისტრი მაკა ბოჭორიშვილი სინგაპურის რესპუბლიკის საგარეო საქმეთა მინისტრს სიმ ანს შეხვდა

2026 წლის 23 ივლისს, სინგაპურის რესპუბლიკაში ვიზიტის ფარგლებში, საქართველოს ვიცე-პრემიერი, საგარეო საქმეთა მინისტრი მაკა ბოჭორიშვილი სინგაპურის რესპუბლიკის საგარეო საქმეთა მინისტრს სიმ ანს შეხვდა, - ინფორმაციას საგარეო საქმეთა სამინისტრო ავრცელებს.

უწყების ცნობით, შეხვედრაზე მხარეებმა განიხილეს საქართველოსა და სინგაპურს შორის ორმხრივი ურთიერთობების აქტუალური საკითხები, საერთაშორისო ფორმატებში თანამშრომლობა და პარტნიორობის შემდგომი გაღრმავების პერსპექტივები.

„მაკა ბოჭორიშვილმა ისაუბრა საქართველოს სტრატეგიულ მდებარეობასა და ქვეყნის მნიშვნელოვან როლზე რეგიონული და გლობალური დაკავშირებადობის გაძლიერების მიმართულებით.

ყურადღება გამახვილდა საქართველოსა და სინგაპურს შორის ეკონომიკურ და სავაჭრო სფეროებში თანამშრომლობის გაღრმავების მნიშვნელობაზე. აღინიშნა, რომ ორივე ქვეყანა წარმატებული ეკონომიკური პოლიტიკის მაგალითს წარმოადგენს, რაც ქმნის ბიზნესკავშირებისა და საინვესტიციო თანამშრომლობის შემდგომი განვითარების შესაძლებლობებს.

მხარეებმა ასევე ისაუბრეს საერთაშორისო ორგანიზაციების ფარგლებში არსებულ თანამშრომლობაზე. მინისტრები შეთანხმდნენ მომავალშიც გააგრძელონ პარტნიორობა დღის წესრიგში არსებულ საკითხებთან დაკავშირებით“, - აღნიშნულია გავრცელებულ ინფორმაციაში.